top of page

PBBM ampon na aki kan CamSur

Sararo an miembros kan Sangguniang Panlalawigan kan Camarines Sur kabali an duwang oposisyon sa pinasar na resolusyon na nagdedeclara ki Presidente Ferdinand R. Marcos Jr. bilang ‘‘adopted son’’ kan provincia.


Pinangenotan ninda Gobernador Luigi Villafuerte asin Diputado Lray Villafuerte an pagtao kan plaque na pigrecibe ni Marcos sa ginibong ground breaking ceremony sa Panganiban Drive, kan Barangay Concepcion Pequeña ciudad nin Naga kan Marso 16, 2023 para sa housing project sa lindong kan Department of Human Settlement and Urban Development (DHSUD) sa paagi kan Pambansang Pabahay Para sa Pilipino program ni PBBM.


An joven na gobernador na nagdesisyon sa huring mga aldaw kan eleksyon kan Mayo 9, 2023 pabor sa kandidatura ni VP Leni Robredo bilang presidente, matapos marecibe ni Marcos an sinambit na resolusyon nagpahayag na obligasyon tang mga Bicolano na kita magkasararo nganing suportaran an administrasyon ni PBBM.


Unidad an saiyang pangapodan sa Camarines Sur asin lideres para ki Marcos, sabi pa ni Gob Villafuerte.

Presidente Ferdinand R. Marcos ‘‘adopted son’’ kan Camarines Sur. Sa Retrato hali sa wala sinda DHSUD Secretary Jose Rizalino Acusar, Diputado Migs Villafuerte kan Rinconada district, PBBM, Gobernador Luigi Villafuerte asin Diputado Lray Villafuerte kan segundo distrito kan CSur. (Retrato hali sa FB page ni Gob. Luigi Villafuerte)


An mag-amang Villafuerte nagpasalamat sa SP sa pamamayo ni Bise Gobernador Salvio Fortuno Jr. asin mga miembros kan junta sa pagpasar kan resolution declaring PBBM bilang adopted son of Camarines Sur.


Pakatapos kan ground breaking sa Panganiban Drive para sa housing project sa Camarines Sur, nagkaigwa man nin kaparejong ceremonia sa Barangay Balatas, ciudad nin Naga sa housing projects kan ciudad na aapodon na The Legacy Residences. An programa pinangenotan ninda PBBM, Alcalde Nelson Legacion asin Bise Alcalde Nene De Asis.


Presente sa magkasuhay na programa sa housing projects iyo si Secretary Jose Rizalino Acusar kan DHSUD asin iba pang miembros kan gabinete.


An DHSUD mapakonstruhir nin 10,000 units pabahay project para sa Camarines Sur mantang sa Naga na igwang 12 storeys igwang 160 units asin sa cada floor area igwang 4x6 meters.


An administrasyon Marcos sa paagi kan DHSUD nagsabi na saro sa prioridad iyo an housing projects para sa 6 milyon na mga familia sa laog nin anom na taon. An proyecto target na makahaman nin on milyon na housing units cada taon. (DPAureus)



Comments


bottom of page