PCSO Mla madesisyon sa reclamo vs STL CSur

Yaon na sa opisina sentral kan Philippine Charity Sweeptakes Office (PCSO) an desisyon kun magpapadagos poon sa Marso 1, 2024 an Evenchance Gaming Corporation na maging operator kan Small Town Lottery (STL) sa tahaw kan kahurotan kan tolong representante asin sarong party list sa Camara-baja na cancelaron na an franquicia.

Mapaso na an saindang franquicia sa Febrero 29, 2024 alagad an reclamo contra sa Evenchance kan mga Representante na sinda Elray Villafuerte, Migs Villafuerte, Tyusoshi Anthony Horiba, asin Bicol saro party list Brian Raymund Yunsuan pigsimbag na sa opisina sentral alagad kun magin paborable sa operator an desisyon puedeng magpadagos kan saindang operasyon digdi sa Camarines Sur.

Napag-araman an minasunod na reclamo contra sa STL operator sa Camarines Sur siring kan ginagamit na front kan ‘‘illegal lotteries’’, pagpalyar sa tamang panahon pagremiso kan kaherasan sa gobierno sa paagi kan bank account kan PCSO, pagsinutil kan Evenchance sa mga reglamento kan Revised Implementing Ruless and Regulations na naggogobernar sa operasyon kan negosyo, pagkua nin mga menor de edad nin mga kolektor sa taya, pagpataya sa menor de edad asin iba pa alagad gabos ini pinahimotikan kan Evenchance sa pinadarang kasimbagan sa PCSO mantang igwa sindang pigpresentar man na evidencia.

An pigreremiso sa PCSO nadalagan sa mga LGU, PNP asin iba pang ahencia.

Si PCSO Provincial Manager Jobet Ramos kan PCSO Camarines Sur kan makuanan nin entrevista kan Bicol Mail sa mga reclamo contra sa operasyon kan STL sa Camarines Sur nagpahayag na yaon sa jurisdiccion kan saindang opisina an dapat mag-aksyon mantang an reclamo asin kasimbagan sinumiter sa main office.

Hagad ninda ki Presidente Ferdinand Marcos na i-blacklist an operasyon kan sugal sa nasyon sa tahaw kan mga pagsinutil sa kasundoan kan PCSO asin agency.

Napag-araman na an Evenchance nagreremiso aroaldaw sa bank account kan kaherasan sa PSCO mantang P20 milyones digdi cada bulan an para sa opisina provincial kan PCSO sa Camarines Sur. (dpa)