PDEA, PNP sunod-sunodan operasyon vs dorogista
Sunod-sunod an operasyon laban sa droga kan mga awtoridad sa Camarines Sur sa laog sana nin sarong aldaw darakulang cantidad an saindang nakumfiscar.
Sa Ciudad nin Naga an pinagsarong fuersa kan Philippine Drug Enforcement Agency (PDEA) asin Naga City Police Office (NCPO) sa ginibong buy bust operation sa C-5 road sa Barangay Mabulo, duwang mga suspechado an saindang natalikop na pigbistong si Jerome Tesorero, 39-anyos kan Barangay Peñafrancia asin Froilan Teves, 41 anyos, tsuper asin residente kan barangay Timbang, Minalabac, Camarines Sur.
Sa operasyon kan NCPO asin PDEA enot nagbakal sinda nin cantidad Php300,000 alagad sa ginibo paghanap pa kan posibleng droga sa laog kan vehiculo nakakua pa sinda ni binolto na nagcacantidad gabos nin Php6.8 milyon.
Sa inbestigasyon sa duwang suspechado, sinabi na saindang arkilado an vehiculo alagad kaipuhan ma-impound mantang kabale ini sa saindang evidencia sa caso sa ilegal na droga.
Si Acting City Director P/Col. Nelson Pacalso kan NCPO nagpahayag an saindang nakumfiscar na shabu nakatalaan kuta nang i-suplay sa pagtaraid na banwaan kan Ciudad nin Naga.
An Php6.8-M na cantidad na droga iyo na an pinakadakulang cantidad na saindang nadakop ngunian na enot na cuarto kan 2022, sabi pa kan City Director.
Sa Calabanga, Camarines Sur mga alas 3:30 nin hapon, Marso 4 nagpadagos an mga awtoridad kan saindang drug operation sa Barangay Santa Salud. Sa Pinagsarong fuersa kan Municipal Police Station asin PNP Provincial Office kan Camarines Sur sa ginibong buy bust operation tolo naman an saindang naarestar.
An mga suspechado pigbistong sinda Mark Capricho y Berzosa, 33 -anyos asin Rey Viola y Sales, 43-anyos, parejong residente kan sinambit na barangay asin Christopher Aborde y Barcenas 37- anyos, kan Barangay Bigaas. Nabawi sa sainda an 55 gramos na shabu na nagcacantidad nin Php374,000 asin mga paraphernalia.
An mga natalikop nag-aatubang na nin caso sa pagbalga kan Acta Republica 9165 o mas midbid sa Comprehensive Dangerous Drugs Act of 2002.