PDLs kan BJMP sa Naga maparticipar sa BSKE

Preparado na an Bureau of Jail Management Penology (BJMP) sa Barangay del Rosario, Ciudad nin Naga nganing liwat makaparticipar an mga prisonero digdi o Person Deprived of Liberty (PDLs) sa nakatalaan na Barangay asin Sangguniang Kabataan Elections (BSKE) sa Oktubre 30, 2023.

Pigserne na an listahan kan ginatos na PDL kan BJMP sa ciudad alagad tutugotan sana an 104 prisonero na compuesto nin 89 mga lalaki asin 15 mga babae na rehistradong botantes sa Commission on Election (Comelec), sabi ni Warden P/Inspector Jerome Gerero.

Sa kaaldawan kan eleksyon, mabilog nin special electoral board na madedestino sa facilidad kan district jail, nakatalaan mag-appoint nin support staff sa voting center nganing mag-asister sa mga botanteng prisoner.

Dai na sinda mapasiring sa voting center kan Barangay Del Rosario envez igwa nang espasyo sa laog kan laguerta kan BJMP alagad pakatapos kan eleksyon dadarahon an horna sa voting center kan barangay nganing digdi na bilangon an mga boto. An mga support staff kan Comelec iyo an mabitbit kan balota na escorted kan personajes kan BJMP.

An madedestinong support staff anas nagtapos sa training nganing aram ninda an trabajo sa pag-asister sa PDLs.

Dawa bakong permanenteng estaran an district jail, pigconsiderar kan Comelec na rehistrado sinda bilang botantes kan sinambit na barangay. Mapoon an borotohan alas 7:00 nin aga hasta alas 3:00 nin hapon.

Sa panahon kan campaign period an mga candidato sa BSKE puedeng magkampanya sa laog kan district jail kaipuhan magpadara ngona nin formal na surat sa warden kan BJMP.

Alagad dapat magdara kan saindang certifico de candidatura hali sa Comelec asin vaccination card.

An PDL perang taon na nakaka-ehercer kan saindang deretso sa pagboto kasunod kan resolusyon kan Commission na nagtutugot sa sinambit na sektor na makaboto cada eleksyon.