PDs kan PNP sa Bicol dai uukagon kan bagong RD

Naglilibot na sa mga PNP Provincial Office sa Bicol si BGen. Jonel Estomo, bagong direktor rehiyonal kan Philippine National Police alagad iginilid muna an plano na ukagon an mga provincial director.

An pagkakaigwa nin bagong direktor kan Bicol PNP dai hinahale na ukagon an mga opisyal particularmente an mga provincial director mantang nabugtak man kan saindang sadiring opisyal na pigtitiwalaan kan saiyang liderato.

Si Provincial Director P/Col. Bernardo Perez nagsabi na normal sa saindang organisasyon na ano man na oras puedeng balasahon asin mahalat sana kun igwang direktiva kun saen naman ibabalyong destino.

An provincial director kan PNP Camarines Sur dai palang nahahaloy na madestino digdi asin naglalaom na kun magkakaigwa nin reorganisasyon posibleng dai pa siya makaayon.

Antes nagpasiring sa PPO Camarines Sur, si Estomo nagcortecia muna ki Goberndor Migz Villafuerte sa Capitolyo Provincial sa Cadlan, Pili, Camarines Sur.

Sinabi ni P/Major Louie Dela Peña, opisyal na parataram kan PPO CSur na nag-atubang sa mga opisyal kan PNP sa provincial an bagong jefe kan Bicol na saro pigtawan nin duon iyo an pagmantenir kan paz y order asin seguridad kan namamanuan.

Mawot mangyari ni Estomo an katuninongan sa rehiyon dawa na ngani igwa pang mga lugar na tataghan kan CPP/NPA.

Sinabi na dapat maheling kan namamanuan sa rehiyon an mga programa asin ginigibo kan kapulisan asin dapat ma-apreciar kan publico na dapat mamate kan mga tawo an extra ordinary na gigibohon kan miembros kan PNP.

Pigpatanid man na dapat maging aksyon agad sa mga hinahagad na tabang kan publico lalo na kun kinakaipuhan an mga pagresponde.

Sa ngunian mantenido an dalagan kan paz y orden sa provincia na dapat ipadagos, sabi pa.

Si Estomo iyo an nagribay ki BGen Bartolome Bustamante na nagserbe sa Bicol PNP sa laog nin pitong bulan. (dpa)