Pediatric vax masikad na sa DepEd CamSur

Nagpuon na an mga pediatric vaccination sa Department of Education (DepEd) mantang igwa man suhay na bakunahan an mga lokal na gobierno kasunod kan saindang preparasyon sa Phase 1 kan expanded face-to-face classes na pigtalaan sa Marso 1.


Pigpunan an pediatric vaccination kan Febrero 23-24 sa walong mga central school sa Camarines Sur na kinababalihan kan Camaligan, Canaman, Calabanga, Magarao, San Fernando, Milaor Pili, asin Ocampo.


Ini an mga pahayag ni Assistant School Division Superintendent Sueno Luzada kan DepEd CamSur sa tahaw kan saindang mga ginigibong pag-andam sa pagbuelta sa F2F Classes alagad bako pang gabos na mga public school sa provincia.


An pediatric vaccination para sa mga nag-eedad nin 5 hasta 11 anyos asin igwa man suhay na age group na edad 12 hasta 17 anyos na ginigibo kan mga lokal na gobierno depende sa nag-aabot na suplay kan vaccines hale sa Department of Health (DOH).


Nangapudan an DepEd sa mga magurang na darahon na an saindang mga estudiantes sa mga vaccination site nganing pagralaogan sa classroom igwa na sindang proteksyon laban sa virus, sabi pa ni Luzada.


An mayoria sa mga paratukdo bakunado na asin sagcod sa booster shot alagad igwa pang dai inaabot huli ta depende sa suplay kan vaccines.


Mandato na kan national IATF sa mga paratukdo na sa pagbalik sa F2F classes dapat bakunado na.


Pinahayag pa na limitado pa sagcod sana sa 25 estudiantes sa cada classroom asin igwa nang pagtugot an mga magurang na mag-atendir sinda sa in person classes.


Piglalaoman kan DepEd mantang padagos na naghuhuros an caso kan Covid-19 base sa datus kan DOH posibleng sa maabot na Marso 1, 2022 ideclara nang alert level 1 sa rehiyon Bicol. (dpa)