Pelikulang Partido piglansar kan ParSU
Ni Sonny Malate
GOA, Camarines Sur --- Piglansar an pinakaenot na short film na pighaman kan Talingkas Film Society kan Partido State University (ParSU) sa Audio Visual Room kan College of Arts and Sciences kan universidad na ini kan nakaaging semana.
Presente sa paglansar kan Pelikulang Partido na may titulong CISNE (swan) sinda Dr. Gemmah T. Barcillano, Dean kan Office of Student Affairs and Services (OSAS), John Vincent M. Baylon, Director kan Culture and Arts Department, Omen Cano, Adviser kan Talingkas Film Society, Ruth Daphne Prila, Adviser kan ParSU Literary Society asin mga estudiante.
An pelikulang CISNE nasa direction ni Ellen Guadalupe asin nagtatampok ki Juliana Frolles asin Darwin John Villaralvo, kairiba an Talingkas Cultural Artists Guild. Ini nagpapahiling kan mahalagang papel kan kababaehan na magkaminsan dae pigtatawan nin maninigong pagmidbid asin importancia kan sociodad.
Si Guadalupe enot nang may nahimong short film na horror an genre. An huben na estudianteng director seryoso sa saiyang passion asin pursigido na makahimo nin mga full length movie sa mga maabot na taon kun saen an tututokan niyang genre iyo an horror.
Sinda Barcillano, Baylon, Cano asin Prila gabos nagpahayag nin pag-omaw asin pag-orgulyo sa pambihirang talento kan mga estudianteng kabarale sa Talingkas Film Society asin ParSU Literary Society.
Mientrastanto, pigbuyagyag ni Cano na an Talingkas Film Society magkakaigua nin Film Festival sa maabot na Deciembre, presenteng taon. Segun sa saiya, igua nang seguradong apat na entry sa film festival na bukas sa mga estudiante kan universidad sana.
Dinagdag kan adviser kan film group na initialmente, matutok an tema kan mga pelikula sa cultura kan Partido, asin sa mga masurunod na taon ini papahiwason dapit sa mga isyu social.
Primerong Pelikulang Partido kan Talingkas Film Society kan Partido State University. (Photo: Talingkas Film Society)
Para ma-validate an mga datus dapit sa cultura, ini ipaparevisar ki Dr. Danilo M. Gerona, midbid na Bicolano historian.
Pigbuyagyag pa man ni Cano na sa maabot na taon, bubukasan ninda sa luwas kan campus an patiribayan sa paggibo nin pelikula tanganing orug pang mapahiwas an Pelikulang Partido.
An Talingkas Film Society nagmamawot na makasumiter nin entry sa film festival kan Film Development Academy of the Philippines sa mga masunod na taon tanganing mas matais an talento kan mga estudiante sa ParSU sa paghaman nin mga de calidad na pelikula.
Sinabi pa man ni Cano na madulok sinda sa mga local government unit tanganing maghagad nin suporta sa advocacia ninda manongod sa pagparambong kan cultura, arte asin istorya kan Partido Area.
An ParSU midbid bako sana bilang nangengenot na institution sa edukasyon sa Partido Area kundi magin sa research, pangkabuhayan asin entrepreneurship, pagheras nin teknolohiya, cultura asin arte asin man-iba-ibang kaaraman asin idea sa comunidad.
An gabos na ini suportado asin sustenido kan administrasyon ni ParSU President Dr. Raul P. Bradecina.