People’s initiative vs SB kan Pili, CamSur

Premirong mangyayari sa rehiyon Bicol an pighihimong People’s Initiative (PI) sa banwaan na ini nganing magpasar nin resolusyon o ordinansa na dai ginigibo kan Sangguniang Bayan.

Maabot na sa 1,000 rehistradong votantes kan banwaan nin Pili, an kabisera kan Camarines Sur an nakapirma na sa petisyon sa people’s initiative na pigsumiter na sa Sangguniang Bayan.

Alagad sinabi man ni Consejal Efren Amesola dai man siya nagcocontra envez dapat paintindihon na marhay sa mga residentes kan barangay, paagihon sa brgy. assembly asin dapat an nagpipirma bakong menor de edad.

Apelo kan consejal na dapat magtobod an tawo sa katutohanan.

An sunod nang pighihimo kan mga residentes iyo an pagtipon nin tres por cientong pirma kan rehistradong votantes cada barangay asin dapat makakua nin total na diez por ciento sa enterong banwaan nganing isumiter sa Election Officer kan Commission on Election, sabi ni Alcalde Tomas Bongalonta Jr.

An PI mandato sa 1987 constitution mantang an Comelec base sa ley iyo an maverificar kan pangaran sa mga nakapirma sa petisyon.

Oras na maaprubaran sa Comelec an namamanuan iyo na an mapanday kan resolusyon asin ordinansa na kinakaipuhan kan LGU.

An resolusyon na haloy nang hinahagad ni Alcalde Bongalonta sa SB na tawan siya nin ‘‘authorization’’ na magpirma sa sarong memorandum of agreement entre kan PAGCOR asin kan LGU sa pagpakonstruhir nin evacuation center asin multi-purpose asin ordinansa para sa ikukonstruhir na P240 milyon na bagong edificio kan mercado publico.

Si Atty. Alfredo Lim, chairman kan PAGCOR nagcierto na madonar nin cantidad P50 milyon para sa sinambit na proyecto sa kabisera kan CamSur alagad kaipuhan an resolusyon na nag-aawtorisar sa alcalde na magpirma sa MEMOAG sa ngaran kan LGU asin an PAGCOR.

Sinabi ni Alcalde Bongalonta sa ibang mga banwaan arog kan Ocampo asin Tigaon nagcooperar tolos si SB huli ta sayang kan proyecto mantang an namamanuan iyo an makikinabang lalo na kun may calamidad, dapat naaprobaran an resolusyon kan 2020 alagad natapos na an enot na cuarto kan 2021 dai pa ginigibo.

Sa lado man kan SB, sinabi ni Consejal Amesola na igwa sindang ginigibo sa kahagadan kan alcalde alagad dapat pakarhayon muna an deed of donation kan lote antes aprubaran an hinahagad na resolusyon.

An ika-duwang isyu iyo an P240 milyon na yaon na sa General Appropriation Act of 2021 nganing gamiton an fondo sa ikukonstruhir na bagong mercado publico sa barangay Old San Roque alagad an SB pig-iinsister ipatindog an proyecto sa barangay San Jose sa dahilan nganing maparani sa barangay kan Palestina asin Cadlan.

An paliwanag kan jefe ejecutivo an GAA iyo an dapat masunod huli ta an bagong mercado publico dapat ibugtak man giraray sa dating market site kan banwaan sa bgry Old San Roque.

Sinda Senador Raul Roco asin Senador Neptali Gonzales iyo an mga authored sa People’s Initiative na naaprubaran sa 18th Congress of the Philippines kan 1988.

An padagos na iriwal politica sa kabisera kan CamSur huli kan dahilan kan paghiro na kan people’s initiative mantang duwa sanang miembros kan SB na sinda Consejales Francis Belen asin Narcel Lopez iyo an kasurog kan jefe ejecutivo mantang an mayoriang miembros kaalyado ni Gobernador Migz Villafuerte. (dpa)