Perfume Nin Pagka Moo’t

An paghuna ko kan inot kong mahiling asin masinghot an hamot nin sarong perfume, ini hale sa sikat na mga para gibo nin olor duman sa Paris sa nasyon kan Francia. An satuyang padangat na lugar, an Ciudad Nin Naga, saro na sa pig bibistong lugar na pinag gigibohan nin de kalidad na Perfume o pahamot. Salamat sa B & B Cosmetics and Solutions, Inc. na iguang oficina sa #36 Zone 6 Balatas Road, Naga City. Duwa sa saindang international quality products an nakadisplay na sa mga tindahan sa nasyon kan Francia arog kan mahamot na perfume na Fina Fine Fragrance asin Reed Diffuser. Propiong taga Naga an nag gigibo kan mg ini, mayong iba kundi si Miss Asella Cruz, aki kan negosyanteng si Joseph Cruz na tubong Dayangdang alagad may dakulang residencia sa pagka laog sana kan Mac Mariano Village. An main brand name kan saindang mga producto iyo an Moo’t, na an boot sabihon “ Love”, kaya sa saindang mga cosmetics asin perfume packaging, mababasa an linyada na “Made with love in Naga City”. Gulpi nang mga beauty experts duman sa Francia, an kumbinsido asin nag uusar kan product na gibo sa Naga City. Ang mga bikolano, bistado sa pagiging mahilig sa mga pahamot kung kaya bakong imposible na mag gikan digdi sa Naga City an saro man nadekalidad na perfume asin kaya nang makipag kumpetinsya duman sa Yuropa. An mga olor na gibo ni Asella Cruz, paborito nang pag usaron kan mga Soltero asin kadaragahan ta ini yaon sa rasonableng precio asin magian sa dungo asin bakong maisog pag sing hoton. Minsan pang naisihan ko man na kaidtong peace time, iguang nabistong sabon na pang karigos asin pang laba, an pinag gigibo kan familyang Salvo asin Contacto na mga taga Sangay sa Partido. Igua kami kaidtong kababaryo na bistado sa apod na Tiyang Tinay Contacto na napangagom ni Tyo Zoilo Salvo. Nag ka inagoman sinda Tiya Tinay na gikan sa Tiwi asin si Tiyo Zoilo gikan sa mga kastilang Salvo na iyo an inot na may kag guraring kan isla nin Atulayan sakop kan Sangay, Dara kan kaaraman kan saindang mga magurang na kastila na kaidto palan antes nag irestar sa Pilipinas,duman sa espanya, an saindang familya iguang fabrika na nag gigibo nin sabon na pang karigos asin sabon na pang laba. Asin sa pag istar sa Partido, nabisto an local na sabon na may pangaran na Ninasa, gikan sa pangarna na Nena Salvo. Haloy na pig usar sa Partido an Nenasa sagkod na ini padikit dikit na nawara ta kulang an suporta kan gobyerno. Mas tinawanan nin konsentrasyon ninda Tyo Zoilo asin Tya Tinay an pagpa dakula kan saindang mga kaakian kaya dai na nag orog pa an Nenasa. Mas pinaboran ninda an pag lipat nin istaran sa Naga tanganing makapag adal an saindang mga aki. Saro sa saindang mga aki na nabisto sa Bikol iyo sinda Fiorel Salvo na naging sikat na announcer asin ngonian naka base duman sa New Jersey sa Amerika. An mga bikolano, tunay na mga mahigos asin ma talentong lahi na kayang makipag kumpetinsya sa mga Amerikano asin mga taga Yuropa.