Peryodista, Pig Rescue nin Baroto

Arog kan nakaugalian kan mga bikolano, na sa pagkalihis kan makukusog na bagyo asin pag baha, yaon an mga pag tiripon tipon sa saindang mga baryo tanganing mag horop horop asin mag irestoryahan. Sa siring na kaugalian niyatong mga bikolano marikas tang nalalampasan an mga maindatang pagmati na dara kan mga pagtios, asin kapagalan sa hararom na pagbaha sa bikol. Sa pagtiripon tipon sa Kantong Putikon sa laog kan SM na perang aldao man na sirado ta inabot nin malaboy na pagbaha, saro sa parating kaistorya iyo si Senyor Louie Ortega, na gustong malingawan an kapungutan kan magka barasa an mga dokumento kabale na ang perang titulo nin daga sa sariyang sadiring Apartment na yaon sa Panganiban Drive. Sa mga istorya, napadalagan an orolay sa inot na Colgante Bridge Tragedy. Idto palan pagka gaba kan Colgante kan taon 1972, iyo an ika duwang pangyayari sa nasabing tulay ta ang inot na disgrasya nangyari kan Penafrancia fiesta kan taon 1957 na ikinagadan nin 198 tao, mas dakul sa bilang kan mga nagadan kan 1972. Mantang nag hihigop nin kape asin hot choco sa kantong putikong padagos an irestoryahan, pinag romdom ni Louie Ortega an saiyang naging papel sa pag donar nin lote na iyo an kinamumugtakan kan City Hall. Sa tahaw ninda naging Mayor Monico Imperial asin Macario Mariano iyo an joven pang si Louie Ortega na iyo an nagmamakinilya kan kasuratan kan donasyon. Iyo na idto an poon na an City Hall ikinaag na sa solar na pig donar ni Mariano sagkod na ikinaag na an iba pang mga oficina kabale na an mahiwas na Civic Center. Sa istorya man ni Journalist Sonny Sales, saiyang pig giromdom an malaboy na baha ni Monang asin an C130 Crash sa Tangcong Vaca. An mga istorya na nakapalibot digdi, liwat na bubuhayon ni Sonny Sales sa saiyang pig gigibong libro na iyo an Historya kan Naga kan dekada 90. Kung si Historian Danny Gerona iyo an nag aaram kan Philippine Historya kan panahon nin Kastila, ngonian kapot man ni Sonny Sales an historya kan Naga lalo na an mga trahedya asin mga importanteng pangyasyari. Si Sonny Sales nag istorya kan peligro kan bagyong Kristine ta saro siya sa pig rescue sa Barangay Santa Rosa sa banwaan nin Magarao. Kan nagraragasa na an bagyong Kristine duman nahiling ni Sonny sales an paglangkaw nin tubig baha sa Magarao, asin mayo siyang ginibo kundi an iluwas an saiyang payo sa labot na lanob kan saiyang harong asin sige an saiyang kagsing para sinda irescue. Nakaabot sa kaaraman ni Mayor Yepyep Senyar an kurahaw ni Sonny asin tolos siya pig sundo nin baroto asin dinara sa halangkaw na parte kan highway harani sa boundary kan Canaman asin duman ninda binaklay an dalan sagkod maka abot sa harong ni Jojo Falcon sa P. Santos sa Bagumbayan Sur. Dakula an saiyang pasalamat ta kung dai siya naisalvar kan baroto kutana saro siya sa mga ibabareta sa medya arog kan ginigibo niya kaidtong siya aktibo pa sa pagsurat sa dyaryo.