PhilHealth padagos sa pagconducir nin Peer and Employers Forum

San Jose, Camarines Sur --- Padagos an ginigibong Peer and Employers Forum kan oficina kan PhilHealth sa probinsiyang Camarines Sur sa pamamahala ni Annelyn Z. San Pablo, Chief Social Insurance Officer. 

Pinakahuring ginibong  pagtiripon  iyo an para sa Partido Area na pigconducir sa banwaan kan San Jose. Enot pa kaini, an sa ibang distrito pigconducir na.  Sunod na gigibohon iyo an para sa Rinconada.

Segun ki Walter Tom dl  Ocampo, Social Insurance Officer I (SIO I)/Collection Section In-Charge, pinagmarhay kan PhilHealth Camarines Sur na dayuhon an mga employer sa saindang lugar mismo tanganing maipaabot sa sainda an update na dapat nindang maaraman.

Sa forum, mga impormasyon   dapit sa membership, contribution, benefits asin availment asin  mga bagong sistema asin patakaran an pigheras kan PhilHealth Team sa mga participantes na gikan sa San Jose, Tigaon,  Goa asin Lagonoy.

Segun ki  Ocampo, an saindang oficina  pursigido sa saindang trabaho tanganing efectibong maiimplementar an Universal Health Care (UFC) Program. Katakod kaini,  higot na pigpapaotob kan PhilHealth  sa mga employer na irehistro asin hulugan an PhilHealth premium kan saindang mga empleados.

Pigtawan doon pa niya  na an employer pigmamandohan na sa laog nin sarong bulan pakaentra sa empleo kan empleado, dapat iparehistro/enroll asin hulugan ini kan maninigong  employer - employee share para sa PhilHealth contribution.

Dagdag pa kan  SIO I na an PhilHealth  nag-iimponer nin  penalidad sa late payment. Nagpagiromdom siya na likayan an mahuri sa tamang eskedyul tanganing mayong penalidad asin dae magkaproblema sa benefit availment an empleado.

Pigpahayag pa ni Ocampo na an PhilHealth may mga nakatalaan na eskedyul sa pagdugang kan PhilHealth contribution asin ini pigtatawan nin mahiwas na pagdesiminar sa mga miembros asin employers.

Mientrastanto, pigbuyagyag kan SIO I na an Yaman ng Kalusugan Program (YAKAP) piglansar na kan oficina ninda sa ciuadad nin Naga. Ini an karibay kan PhilHealth Konsulta Package na pinahiwas an outpatient benefits.

An significanteng dagdag  servicio sa irarom kan YAKAP iyo an cancer screening. Manonotaran na sa presente an caso nin manlaenlaen na klase kan cancer orug na naglalangkaw sa bilog na nacion. 

Saro pang dagdag servicio kan YAKAP iyo an  pag-acredit na kan mga farmacia bilang  service provider  tanganing maacomodar an dagdag na medicina sa irarom kan YAKAP.

An servicio asin beneficio sa YAKAP maaaprobecharan sa mga facilidad na acreditado sa programang ini. Ini an pig-implementar tanganing masimbagan an ladong preventive care bago pa maglaog sa mas magastos, peligroso asin makahadit na curative stage. 

An PhilHealth padagos na nagpaparani kan servicio sa mga namamanwaan. Digdi sa Partido Area yaon an PhilHealth Service  Office sa lumang oficina kan Land Transportation Office (LTO) sa Goa. Sa Rinconada Area igua kan kaparehong sub-office sa Nabua, Camarines Sur.

Si Walter Tom dl Ocampo kan PhilHealth Camarines Sur (Photo - PhilHealth CamSur)