Php10-M alokasyon sa Covid vaccines kan LGU

Calabanga, Camarines Sur --- Preparado na an lokal na gobierno sa banwaan na ini kan saindang fondo nganing magbakal nin coronavirus disease vaccines alagad limitado an saindang alokasyon cantidad cinco hasta diez milyon pesos.

Si Consejal Levy Sta Ana Jr., miembro kan Sangguniang Bayan nagsabi an saindang alokasyon sa bakuna kabale na sa P278 milyon annual budget ngunian na 2021.

An Municipal Health Office (MHO) iyo an nagrecomendar kan alokasyon afuera kan saindang pighahalat na suplay kan gobierno nasyonal.

An storage facility sa barangay Sabang, Calabanga iyo an puedeng gamiton nganing digdi sarayon an suplay sa bakuna, sabi pa ni Sta. Ana.

Si Presidente Rodrigo Duterte nag-awtorisar na sa mga lokal na gobierno na puede nang mag -‘‘advance payments’’ sa pambakal kan Covid-19 vaccines.

Sa pinaluwas na memorandum order dapat dai magsobra sa quince (15) por cientong advance payments an sunodon kan LGUs sa total na cantidad na saindang babakalon na suplay nin bakuna.

Alagad posibleng magpaluwas nin bagong Memo Order an Malacañan nganing tugotan nin sagcod sa 50 por cientong advance payment nganing maparikas an mass vaccination program.

Dai paman sinabi kan LGU Calabanga kun saen sinda mabakal na pharmaceutical company kan vaccines.

Oras na mag-abot na an bakuna, si Alcalde Ed Severo iyo an piglalaoman na enot na mapatudok nganing mahale man an pagduwa-duwa kan residentes kan saindang banwaan sa posibleng negativong epekto kan bakuna.

Kabale sa tatawan prioridad iyo an mga health workers, frontliners asin PNP. (dpa)