Php180-M fondo kan LTFRB sa libreng sakay

Magpapadagos an Service Contracting Program (SCP) kan Land Transportation Franchising and Regulatory Board (LTFRB) sagcod na dai nauubos an alokasyon na Php180 milyon para digdi sa rehiyon cinco.

Si Perry Solano kan LTRFB Bicol nagpahayag sa ginibong launching sa City Hall sa Ciudad nin Naga kan Libreng Sakay Phase 3 sa SCP para sa mga pampasajerong public utility na rehistrado bilang transport cooperative.

An mga calificado sana sa SCP si mga PUJ, van asin bus na miembros kan cooperativa asin rehistrado sa Cooperative Development Authority (CDA).

Warak na an ‘‘Libreng Sakay Para sa APOR’’ sa anom na provincia kan Bicol maging sa iba pang rehiyon mantang igwang nakatagamang fondo an gobierno nasyonal na nagcacantidad nin Php3.3 bilyon sa General Appropriation Act.

Alagad an mga operator asin tsuper na naglaog sa programa kan ahencia sa 2nd Phase kan programa nagrereclamo huli ta sagcod sa ngunian dai pa girararay nababayadan kan LTFRB. An problemang ini bako lang digdi sa Bicol envez ‘‘nationwide’’ base sa enot na mga pahayag ni director Gardiola.

Alagad sa phase 3 an pangako kan ahencia magbabayad na nin cada semana pagkayod.

Dakul nang mga cooperativa nin pampasajerong sasakyan an naglaog sa SCP dawa aram ninda na abalahon an bayad kan ahencia huli ta dakula an contrata na babayadan kan LTFRB aroaldaw base sa kilometraje sa viaje an cuentada sa pagbayad.

Bukas pa an ahencia sa pag-ako kan mga aplikante alagad kaipuhan kumpletohon ngona an rekisitos siring kan lisensya sa pagmanijo, kopya kan OR/CR, certifico na sinda rehistrado sa CDA asin iba pa.

An pagpadagos kan SCP bilang tabang kan gobierno sa mga tsuper asin operator na apektado an saindang hanap buhay kan nakaaging duwang taon na pandemya.

Sinabi pa kan LTFRB an PUV na kabale sa SCP igwang suhay na terminal nganing aram kan pasajeros an saindang lugar asin pag-monitor kan ahencia aroaldaw. (dpa)