Php4.9-M subsidiya kan City Hall sa bus terminal

Kun dati nagreremiso nin milyones peso an manijamiento kan Bicol Central Station (BCS) sa City Hall mantang paduwa nang taon nalulugi an operasyon nganing dai mahale an empleados asin mantenido an terminal nagsusubsidiya an lokal na gobierno.


Si Roderick ‘‘Nonoy’’ Reforsado, terminal manager kan BCS nagpahayag na padagos an subsidiya kan ciudad na nagcacantidad nin Php408,333 bulan-bulan sa total na Php4.9-M sa bilog na taon mantang lugi pa an saindang operasyon sa gross income bulan-bulan na Php1.5 milyon.


Sa normal na operasyon kan BCS kan mayong pandemya naglalabi sa Php4 milyones peso an saindang gross income.


Si dating 200 hasta 300 na buses an nagdadalagan sa viaje Naga asin Manila alagad sa ngunian igwa sanang walong buses an regular kan saindang viaje BCS terminal hasta sa Parañaque Central Terminal. Afuera kan provincial buses sa Bicol na dai na naglalaog mantang kontrolado sinda kan kumpanya.


Nganing mamantenir an empleados, nag-implementar siya nin mga pagtipid arog kan si dating 24/7 ginibo nang alas 4:00 nin aga hasta alas 9:00 nin banggui an operasyon, hinale an mga overtime asin differential fee kan empleados, nagtipid sa kuryente asin tubig alagad an mas mahalaga mayong hinaling empleados sa tahaw kan pandemya, sabi pa ni Reforsado.


Dawa yaon na sa Alert level 2 padagos an susbsidiya kan City Hall ngunian na 2021.


Dinagdag pa ni Reforsado na kun estrictong na-iimplementar an health protocols mayo nin problema dai nakakalaog an pasajeros na may bitbit nin virus.


Sa direktiva kan Land Transportation Franchising and Regulatory Board (LTFRB) si dating 50 por cientong sitting capacity sa viaje kan bus alagad sa Alert level 2 ginibo nang 70 por ciento.


Nagtutubod an terminal manager na puede man tugotan na kan LTFRB na magviaje na an gabos na may franquicia envez kan 50 por ciento an na-iisyuhan nin special permit.


Sa lindong kan new normal hinale na an terminal-to-terminal kan viaje kan mga bus asin puede nang mag-pick up nin pasajeros alagad an lokal na govierno dapat igwang terminal na iyo an aagihan kan bus sa pagviaje pasiring sa Manila.


Piglalaoman na sa maabot na Deciembre 15 hasta Deciembre 20, 2021 dakul an mga magpupuruli hale sa Manila pasiring digdi sa Camarines Sur. (DPAureus)