Php63-Milyon alokasyon sa vaccines dai makahiro

An lokal na gobierno kan Ciudad nin Naga iginilid muna an planong re-alignment sa ibang proyekto kan P63 milyon na alokasyon nganing ibakal nin vaccines laban sa coronavirus disease dawa sagcod sa ngunian dai pinipirmahan kan Department of Health an multi-party agreement (MPA) sa ciudad tanganing makabakal na nin suplay na vaccines.

Langkag na an City Hall apat nang bulan pigsumiter ki Secretary Francisco Duque alagad mayo pang kasimbagan nganing makabakal na nin vaccines sa tahaw kan perang aldaw nang padagos an paglangkaw kan caso kan Covid-19 sa ciudad.

Si Budget Officer Frank Mendoza nagpahayag na dai muna ninda hihiroon an cuarta alagad kun dai man aprubaran kan DOH an saindang MPA puedeng gamiton giraray an fondo sa Covid response.

Naghahalat giraray sinda nin kunsiderasyon sa DOH mantang apat nang bulan pendiente an saindang aplikasyon sa MPA matapos ipadara ni Alcalde Nelson Legacion an surat kan Hunyo 2021.

Si Consejal Sonny Rañola, chairman kan Committee on Health sa Sangguniang Panlungsod nagpahayag na dapat aktuaran na kan DOH an MPA mientras katuyohan kan ciudad para sa proteksyon kan namamanuan kan Naga contra sa virus.

Sa ngunian kulang pa sa 20 por ciento an nababakunahan sa 209 mil na populasyon kan ciudad.

Kun aprubaran an MPA dakulang bagay nganing maparikas an vaccination sa mga residentes kan ciudad na apektado na an pagbuhay huli kan halangkaw na caso kan Covid-19 yaon pa an homa kan delta variant.

Bako lang an Naga dai inaaprubaran an MPA envez 62 sindang mga LGUs.

An suplay bakuna sa ciudad utay-utay an pag-abot hale sa DOH asin an ahencia man sana an nakakaulang kun dai aaprubaran an MPA, sabi pa. (dpa)