Php646.6-M tinataong ayuda kan DA Bicol sa mga paraoma

Padagos an mga ginigibong pagwaras kan Department of Agriculture sa Bicol kan Php5,000 na Rice Farmers Financial Assistance (RFFA) sa mga paraoma nin paroy sa apat na provincia kan Bicol.

Nagsikad an pagwaras kan RFFA cash assistance kan Oktubre 10, 2022 sa apat na provincia kan Camarines Norte, Albay, Catanduanes asin Sorsogon. Maabot sa 125,563 nin mga paraoma na rehistrado sa Registry System for Basic Sectors in Agriculture na igwang duwang hektarya an natawan na kan maabot sa Php646.6 milyon cantidad kan RFFA cash assistance.

An Camarines Sur asin Masbate dai pa kabali mientras pighahalat an pagpaluwas nin fondo kan Land Bank of the Philippines.

AYUDA SA PARAOMA. Ribo-ribo nang paraoma sa Bicol an nakarecibe kan saindang RFFA cash assistance hali sa Department of Agriculture. Sa retrato maheheling an nakatukaw na mga paraoma sa Camarines Norte na marecibe kan cash assistance. (DA Bicol)

An fondo hali sa Php10 bilyon na Rice Competitiveness Enhancement fund (RCEF) natipon taon-taon sa laog nin anom na taon matapos pirmahan ni dating Presidente Rodrigo Duterte an Rice Tarrification Law o Acta Republica 11203 Kan Febrero 14, 2019. Magpapadagos an RFF hasta sa 2026.

Sa provincia nin Albay, 30,307 rice farmers an natawan nin total na Php156 milyon sa kabilogan na cantidad kan RFFA. Sa Camarines Norte igwang 8,431 na mga paraoma nin paroy asin ini igwang total Php43.4 milyon. Sa Catanduanes, 5,778 na paraoma nin paroy na natawan nin total na Php29.7 milyon. Sa Catanduanes igwang 5,778 na mga paraoma na nawarasan nin total na cantidad Php27.7 milyon asin sa Sorsogon 18,585 na mga paraoma na igwang total na Php95.7 milyon.

Segun ki DA Bicol Executive Director Rodel P. Tornilla, an ahencia naglalaoman na makakatabang an sinambit na cash assistance sa mga paraoma, ‘‘alagad afuera kan cash assistance padagos pa an mga ginigibong interventions sa mga paraoma nin paroy sa paagi nin banhi certified na paroy, fertilizer discount voucher, asin mga tabang teknikal’’.

Kabali sa mga tinatabangan kan DA iyo an mga paratanom nin mais, high value crops, asin nag-aataaman nin mga hayop. Nagtatao pa nin live animals, bulong asin biologics para sa mga hayop siring kan orig, manok, baka damulag asin kanding.

Nagparticipar sa programa sa distribusyon iyo sinda Earl Vincent Vegas, Rice Program Focal Person sa Legazpi Convention Center sa provincia nin Albay; sa Sorsogon pinangenotan ni Adelina Rosa. Jefe kan Agribusiness and Marketing Assistance Division; sa Camarines Norte nag-atender sinda Gobernador Ricarte Padilla asin Bise Gobernador Joseph Ascuna; sa Catanduanes, yaon man si Gobernador Joseph Cua, Congressman Eulogio Rodriguez asin Congressman Jose Teves Jr. (DPA/Lovella P. Guarin)