Physical distancing dai na uso sa Naga - NCPO
Nagiging tugak na an nagkaperang mga establisimiento de negosyo sa Ciudad nin Naga sa pagpasunod kan health protocol sa pagtubod ninda na pinagpag na ni bagyong Rolly asin Ulysses an virus.
An iba sa sainda na isyuhan na nin tiket asin pinamulta base sa ordinansa laban sa Covid-19 kan lokal na gobierno kan ciudad, alagad dai paman nginaranan kan Naga City Police Office.
Kun magiging pabaya an mga negosyante sa laog kan saindang establisimiento, namemeligro na maglangkaw an caso kan coronavirus (Covid-19) sa ciudad.
Si Police Lt. Col. Errol Garchitorena, deputy city director kan NCPO nagpahayag na saiya nang pinapatanidan an padagos nagsisinutil kan dai pagsunod sa mga restaurant kan physical distancing na dai dapat maging ‘‘relax’’ an mga negosyante mantang dai pa nahahali an problema sa pandemya.
Sa saindang pagpatrolya naheling an mga darakulang establisimiento na baliwala na an physical distancing arog kan lugar sa Magsaysay Avenue, Peñafrancia Avenue, Elias Angeles Street maging sa mga mall.
Hinagad kan NCPO kun ano an naging penalidad kan City Hall matapos ma-isyuhan nin tiket an pasaway na mga negosyante mantang pig-aandaman ninda an sunod na surprisang inspeksyon nganing liwat mafinaran base sa pigmamando kan ordinansa asin policia kan IATF.
Kun saindang papabayaan an ugali ninda nagluluwas na lingas kugong an saindang pag-estricto, sabi pa ni Garchitorena.
Sa Public Safety Office (PSO), sinabi ni Arnulfo Fausto an jefe kan Traffic Management Center na liwat nindang pinapatanidan an sektor nin transporte huli ta dai na nagsusunod kan physical distancing, paghale na kan face mask asin face shield mientras na yaon sinda sa laog kan vehiculo.
Posibleng nagtutubod an publico na nagkulpa na an mga caso sa coronavirus asin natahuban na kan mga nakaaging calamidad.
Sa listahan kan PSO igwa nang 1,190 na nagkadarakop na dai nagsusulot nin face mask asin dai nagsusunod sa physical distancing.
Nareparo pa na dakul nang mga pampasajerong jeepney an dai nagsusunod sa physical distancing sa saindang pasajeros.
Maging an mga tsuper nin trimobile dai pa ngani na-eenmiendahan an ordinansa na gibohon nang duwa an saindang pasajero alagad lingaw na kan physical distancing. (dpa)