PI dai nakalibot sa 3rd district kan CSur

Dai pa sinususpende kan Commission on Election (Comelec) alagad mayong naglangtad asin naglibot na people’s initiative sa 3rd congressional district kan Camarines Sur sa signature campaign para sa pag-enmienda kan 1987 constitution mantang igwa nang nagprubar sa ibang distrito.

Sa mga barangay kan Ciudad nin Naga dai pa nagbubutwa an arin man na grupo mala ngani an Commission on Election (Comelec) sa ciudad mayong narerecibing signature form, sabi ni Election Officer Abogado Maico Julian Jr.

Narecibe na kan mga opisina lokal kan commission an memorandum hali sa saindang main office na sinususpende an pagrecibe kan mga signature form.

Maging sa iba pang municipalidad kan kaparejong distrito sa laog kan tercer distrito na sakop ni Represdentante Gabriel H. Bordado Jr.

Kun igwa man digdi sa Camarines Sur napag-araman kan Comelec Officer nangyari sa Partido Distrito sakop ni Representante Arne Fuentebella.

Nagigin mainit an isyu sa PI sa provincia nin Albay na igwang karibay na P100 sa mapirma, segun sa enot na mga pagbuyagyag ni Albay 2nd District Representative Edcel Lagman.

Sinabi kan Comelec kaipuhan an tres por cientong rehistradong botantes nakapirma sa People’s Initiative sa cada distrito asin doce por ciento sa bilog na nasyon nganing mangyari an pigtutulod na charter change.

Dinagdag pa ni Julia an saindang pigkakasibotan iyo an nakatalaan na voters registration sa Febrero 12 hasta Septiembre 30, 2024.

An nakatalaan na rehistrasyon matapos saindang marecibe an continuing registration resolution hali sa saindang opisina sentral bilang pag-andam sa local asin national elections sa Mayo 2025.

Nag-apelo an Comelec na magpalista nin amay nganing dai na aboton kan ultimo diya nganing dai na mangyari an pag-surok-sukan kan registrant.