Pierde, Gana
Ngonyan pa lang may mga nagbuburuburutwa nang mga pangaran kan mga aspirantes para alkalde asin ibang opisyales sa mga baro-banwaan sa Camarines Sur. Amay pa an gibsaw pero kaipuhanan maski magaragastaos na dapat mabisto na kan tao.
An iba ngani naglilibot-libot na asin naghihinghing na kan saindang intension, an iba man nasasambitan na an mga pangaran sa radyo asin peryodiko ta nagpopoon nang magpa-interview.
An iba man naglalaog na sa mga kontrobersiya sagkod na makiiwal asin magtabuga asin matabuga tanganing pag-orolayan. Garo man ngaya artista.
Igwa man daing girong pero sige nang tipon nin paragastos.
Igwa man nagpapapogi na asin nagdudulok na sa mga among o heganting politiko tanganing maiiba sa linyada.
Sa 1st district, duman sa Sipocot si dating alkalde mabuelta daa. Sa Cabusao iyo man. Sa Ragay magpirinsan giraray an maburulyada. Sa Lupi idtong babaeng agom nin broadcaster dai pa nadesisyon kun mabuelta. Sa Del Gallego Tagalog-speaking versus Bikol-speaking man giraray.
Sa 2nd district: Libmanan, an malaban ki incumbent Mayor iyo si vice-mayor. Sa Pasacao dating Bokal an ma-Mayor, sabi ni bossing, ta si incumbent Mayor mabokal na. Sa Pamplona 3-cornered fight incumbent kontra sa 2ng ex. Sa San Fernando si vice palaban na kontra ki Magdalo. Minalabac si ex-Villegas malaban giraray kontra ki Mayor Lizardo, may huring-huding na si ex-Basmayor iyo na an ma-vice ki incumbent Lizardo.
Sa Milaor nagtuga na kan mga pangaran an may mga intensyon: Edith Lopez para mayora, Bong Avanceṅa for mayor, Jun “Mullach” Dialino para vice - - - gabos sinda laban na ki Mayor Lhabas.
Sa Pili si Divinagracia gusto pa man maglaban ki Bongalonta ta iyo an kagustohan kan itaas. Pero si vice-Mayor Solano ta nakanamit nang maging acting-Mayor gusto naman magsabat ki Mayor Tom.
Sa Tinambac an broadcaster na si Ervin Borja pigpipirit na labanan si incumbent Mayor Tuy kaya lang magpinsan sinda. Si Mrs. Baby Reyes de Guzman na kuta kundi may mati-mati na.
Sa Calabanga pirmi nang si vice-Mayor De Villa an manok ni Mayor Severo ta si Mayor Severo napirit na ni Cong. LRay na magbokal sa 3rd district sangli ki Angel Naval. Si Naval napaki-ulayan ni LRay na mag-mayor na lang sa Caramoan kontra ki Mayora Marilyn Co. An latest, an dating mayor na si Onyok Cordial na pinsan man lang kan agom ni Naval na maski pigpasibog ni LRay malaban man giraray kaya 3-cornered fight duman.
Bombon si dating magkalaban. Magarao mayong kalaban si Yip-Yip. Baka si Arvin Parma an isabat. Canaman, si ex-mayor Joel Abante iyo an malaban ki incumbent Mayor Legazpi.
Sa Nabua saro naman na opisyal nin military o PNP, retirado, an gustong maglaban sa pamilya Simbulan. Sa Buhi si ex-mayor Lacoste an malaban sa incumbent na Mayora.
Sa Balatan, Bato, Bula nag-uurulay pa. Sa Baao tarakot magsabat ki incumbent Mayor Besinio.
Sa Iriga na engrande an politika, last term na si Mayora Madel kaya malaban na kontra ki Gov. Migz para congressman kan Rinconada kaya si hermano niyang Gang-Gang na dati man na alkalde iyo nang ilalaban.
An masabat sa Alfelor kapwa Alfelor, kun bakong saro, duwa: Si Nonokoy saka si Atty. Peachy Alfelor Moraleda.
Sa Ocampo dati man giraray. Tigaon, Sangay siyempre pareho Fuentebella, mayo pang nagbubutwa na masabat ki Mayor Marcel Pan sa Goa. Sa Presentacion dati man giraray. Sa Garchitorena garo si Kgd. Edwin Lara, broadcaster, an matumang sa incumbent. Sa Siruma iyo man giraray an maralaban.
An politika ngonyan sa lado lokal magastos pero dikit lang an kapital. Manggana mabuelta an kapital. Madaog, bawi man ta gulpi an tinatao kan partido na paragastos asin kinukua pang consultant na lider man giraray sa banwaan sa masunod na eleksyon.
An politika sa lokal hanapbuhay kun gana ganansya, kun daog delinsya pa, may sweldo pa sa masurunod na taon.
Kaya kun minsan pierid, gana.