PIGPUBLIKAR KAN DHSUD: Sindicato sa transaksyon sa mga lote, pigbuyagyag
Perang taon nang pigbuyagyag kan National Drive Against Professional Squatters and Squatting Syndicate (NDAPSSS) an pangaran kan Hermogenes Rodriguez Group asin Henry Rodriguez na kabale sa 22 na mga pangaran asin grupo sa alegasyon na ‘‘Squatting Syndicates’’ envuelto an mga propriedad.
An Hermogenes Rodriguez, pigpahayag iredero si Henry Rodriguez naka-paskil an saindang mga pangaran asin iba pa sa lanub kan opisina kan Social Housing Finance Corporation (SHFC) sa JMR Coliseum, Brgy. Triangulo, Ciudad nin Naga na sarong attached agency kan Department of Human Settlements and Urban Development (DHSUD).
Sa entrevista ki Will O. Peron, empleado kan SHFC sa Ciudad nin Naga sinabi kaini an katuyohan sa pagpaskil nganing patanidan an publiko na dai maglaog sa ano man na transaksyon sa pagbakal nin daga sa sinambit na mga persona.
Alagad saiyang piglinaw an opisina sentral kan DHSUD iyo an nagpa-publikar sa saindang opisina kan mga pangaran na envuelto sa ‘‘Squatting Syndicates’’. An ahencia may programa labanan an sinambit na pigsasabi nindang sindikato asin dapat maaraman kan publiko.
An pangaran ni Henry Rodriguez, enot nang sinabi ni Teofilo Tandaan sa media interview na nagpapabistong taohan siya kan claimants kan 72 hektaryang lote sa Barangay Triangulo, Ciudad nin Naga na saindang kinurudalan an mga propriedad kan mga negosyanteng Engr. Ben Sia, Roberto Obiedo asin iba pang negosyante na apektado kan pagkudalan.
An grupo ni Tandaan kaibanan an mga security guard kan Velocity Security Care Agency na siya an may sadiri iyo an nagkurudal sa sinambit na mga propriedad nin mga negosyante kan Deciembre 29, 2021, na enot nang nagprubar magkudal kan Deciembre 24, 2021 sa propriedad kan nagcacandidatong alcalde Fortunato ‘‘Tato’’ Mendoza alagad nagpalyar kan sabaton man kan taohan kan negosyante.
Alagad an kinuradalan na mga propriedad nin negosyante nabawi kan mga kagrogaring na igwang pugol nin titulo kan saindang grupohan kan saindang mga security guard asin parakudal na dai nakahiro an dikit na numero kan mga naka-duty security guard ni Tandaan.
An pagbawi kan envueltong propriedad pig-asisteran kan mga kapupulisan na iyo an nagmantenir kan paz y orden.
Sa naka-paskil sa opisina kan SHFC an envueltong ahencia kaini kinababalihan kan Public Attorney’s Office, PNP, NBI, Office of the Solicitor General, Land Registration Authority, National Anti-Poverty Commission, Department of Justice, asin National Housing Authority na inaapod na NDAPSSS.
Nakasurat pa sa tataramon na tagalog iyo an ‘‘Huwag basta-bastang maniwala sa mga nag-aalok ng lupa sa murang halaga alamin kun sila ang lehitimong nag mamay-ari ng kanilang lupang binebenta’’.
An taohan ni Rodriguez na si Tandaan sa paagi kan saindang nakadestinong security guards sa kinudalan na propriedad kinaulay kan Bicol Mail nganing hagadon an CP number kan taohan kan claimant nganing makua an saindang lado alagad dai man nagtao kan numero kan telepono sa dahilan na dai ninda nakokontak.
Sa paagi kan pigpaskil nindang Supreme Court decision No. 182645 na yaon sa tarpaulin kan dai pa nababawi, nakasabit sa kudal na saindang pig-display sa publiko posibleng iyo na ini an saindang pagtubod na legal an pakikipag-laban kan ‘‘claimants’’ kan propriedad.
Base sa dokumentos na saindang pigbiklad sa enot na press conference kan Hunyo 2017 si Don Hermogenes Rodriguez, Gobernadorcillo kan Manila, mayong agom asin mayong aki, huli kaini an iredero an saiyang tugang na si Antonio, na naka-agom asin may aki nin duwa, na iyo man an may deretso komo mga iredero.
Base sa desisyon kan SC, an ‘‘great grandson’’ kan Antonio, sa persona ni Henry F. Rodriguez, iyo an na-assigned bilang heir-estate administrator.
Afuera pa kaini, si Atty. Reynaldo Herrera, legal counsel kan Rodriguez sa saiyang surat na petsado Noviembre 6, 2021 sa City Hall na naka-address ki Alcalde Nelson Legacion, City Director Col. Marlon Catan kan NCPO, Barangay Captain Allan Berriso asin ki City Engr. Alexander Caning, nag-iinpormar na sa paagi kan desisyon kan RTC Branch 34 sa Ciudad nin Iriga ma-implementar kan orden kan jusgado petsado Febrero 28, 2000, ‘‘authorizing the Attorney-In-Fact na maglaog sa lote na 72 hektarya sa Triangulo, Ciudad nin Naga asin magbugtak nin palibot na barb wire. Naka-attached pa sa surat iyo an xerox copy kan Certificates of Finality na pirmado ni Juez Lori Valencia-Bagalaca. (dpa)