Pilapil kan Lagonoy pinakahuben na alkalde sa Bicol

Ni Sonny Malate

Lagonoy, Camarines Sur --- Si Alkalde Dyego Luiz H. Pilapil iyo an pinakahuben na alkalde sa bilog na Kabikolan. Siya 22 años, santaon na matua sa pinakahuben na  alkalde sa bilog na nacion, Jamila Ruma kan Rizal, Cagayan.

Maroromdoman na kan nakaaging  midterm local asin national elections, an isyu dapit sa edad an  pigbatikal kan mga kalaban sa politica ki Pilapil. Ini dae nagtrayumpo asin linamangan niya nin 918ng  votos an saiyang  kalaban  na saro nang senior citizen.

An huben na Pilapil piglatagan  nin apat na candidatong kaapelyedo niya na pighihiling sarong  pangparibaraw sa mga votantes. Ini an pigdiscalificar kan Comelec base sa mga regulaciones kan ahencia kaya nagin one on one an laban. Tanggurangan versus sulog na manok!

Sa saiyang inaugural speech durante kan inauguration asin turn over ceremony kan nagtalikod na semana, pigtawan nin doon kan huben na alkalde na an isyu bakong sa edad kundi abilidad.

Segun ki Pilapil  an kaipuhan sa sarong servidor iyo an  magkaiguang  sinceridad, dedikasyon asin totoong pagmakulog sa kapakanan kan mga constituentes. Bilang huben na lider mawot niya na magin sarong role model asin inspirasyon sa mga kapareho niyang hubenes.

Nasa likod kan huben na alkalde bilang guiya sa pagkakaigua nin toltol asin marhay na paggovernar iyo mismo an saiyang kapamilya na sinda dating  alkalde Delfin, Jr. asin Delfin (JB) Pilapil III.

Mientrastanto, maogmang pigpahayag kan alkalde na sa laog kan taon na ini, mapoon na an primerong kabtang kan construction kan modernong mercado publico sa Lagonoy. 

An P50M na fundo para digdi gikan sa oficina ni Cong. Arnie B. Fuentebella. Piglalaoman na ini orug pang mabusol kan economia kan Lagonoy na naging  1st class municipality sa huring termino ni dating alkalde JB Pilapil.

Orgulyong sinabi kan alkalde na an plano asin disenyo kaini pag-uurolayan pa kan oficina niya asin ibang katabang na ahencia. Pigseguro niya na ini mas moderno kun icocomparar sa mga saodan sa pagtaraid na banwa.

Dinagdag ni Pilapil na priority program niya iyo an pagsustenir kan marhay na  salud kan mga namamanwaan. Katakod kaini, papakarhayon kan local na gobyerno an mga barangay health center, an estructura, personahes,  medicina asin supply didgi.

Apwera kaini, mawot man kan bagong alkalde na tawan atensyon  an mga programa dapit sa edukasyon, social services, kabuhayan, paz y orden, comunikasyon/teknolohiya, infrastructura, environmental protection asin youth development.

Pigtawan man doon ni Pilapil na particular niyang tututokan an programa sa turismo sa paagi kan pagkakaiguang actibong Municipal Tourism Office. An Lagonoy midbid sa mga magagayon asin makawiliwiling kadagatan asin baybayon, waterfalls, kabukidan, mga salog asin native products.

Famosong tourism event digdi iyo an Samhod Festival na ipinangaran sa One Town, One Product kaini. Yaon pa man an Peñafrancia Regatta Festival sa Lagonoy North.

Apwera kaini, pambihirang tampok kan banwa iyo an saradit na mga festival sa kada barangay digdi na bistado sa mga manlaenlaen na producto local arog kan binanban, puto tabla, ampaw asin dakol pang iba.