Pinagibong Lorry Boat kan MNWD, ‘ghost project’
Malimang taon na matapos basbasan an Lorry Boat (LB), sagcod sa ngunian nagpapatawpataw sa Bicol river na ginastosan milyones pesos kan Metropolitan Naga Water District (MNWD) alagad dai man napakinabangan asin kunsiderado nang ‘‘ghost project’’.
Sa entrevista kan Bicol Mail ki General Manager Florencio Mongoso Jr., sinabi kaini na duwang veces na nindang pig-auction alagad mayong nag-abot na interesadong negosyante nganing magbakal.
An lorry boat ginastosan nin maabot sa otso milyones pesos asin binagsak na ngani sa P4 milyones sa pigtalaan na subasta alagad mayong nag-abot na interesadong mabakal.
Si Mongoso na iyo an nagmana sa pagkalugi kan manijamiento nagsabi pa sa BM sainda nang binagsak an presyo mantang nag-depreciate na an baroto asin mayo pang interesadong ‘‘buyer’’.
Katuyohan kan proyecto kan mga nakaaging administrasyon nganing magpabakal nin tubig an MNWD sa mga residentes kan barangay na yaon sa gilid kan salog bako lang sa Ciudad nin Naga maging sa pagtaraid na banwaan. Afuera kaini, kun igwang calamidad pueding pang mag-deliver nin malinig na tubig inumon.
Alagad dai man naheling kan mga residentes nganing mag-deliver sa sainda nin tubig inumon mantang dai man dinagos kan mga nakaaging manijamiento an operasyon huli kan dakulang posibilidad malugi mantang kadakli kan mga residentes sa gilid kan salog igwa nang sadiring linya hali sa water district kan ciudad.
An proyekto pigponan kan panahon ni dating Board President Fortunato ‘‘Tato’’ Mendoza alagad ginibo sana an ‘‘blessing’’ kan LB sa panahon ni dating Acting General Manager Virginia Nero na ngunian Department Manager kan water district. An actividad ginibo mga taon 2018 sa Camaligan river, Camaligan, Camarines Sur.
Sa premirong mga taon sa puesto ni dating General Manager Virgilio Launsing kan 2019 saka sana nakakua nin Maritime permit na tinutogotan nang magdalagan sa Bicol River an LB.
Sa ngunian sinabi pa kan MNWD nakatiwangwang an lorry boat sa salog kan Naga particulamente sa Barangay Tabuco.
Sa ngunian nakakabangon na an water district mantang sa pinakahuring financial report kan Enero 2023 nagganansiya nin P5.6 milyon. (dpa)