Pinahiwas na tinampo piggigibong garahe

Natapos na kan 3rd Camarines Sur Engineering District kan DPWH sa Baras, Canaman, Camarines Sur an pagpahiwas kan tinampo sa Peñafrancia Ave., alagad ginigibong garaje nin mga vehiculos mantang igwang mga ulang na poste kan Camarines Sur II Electric Cooperative (Casureco II).

An kalabaan kan Peñafrancia Avenue gurobot an bulos kan trafico lalo na kun oras nin ralaogan sa klase asin ruluwasan kan mga estudiantes mantang an lugar na ini yaon digdi an nagkaperang mga kolehiyo maging escuelas publica.

Pabor sa traffic enforcer kan Public Safety Office (PSO) an pagpahiwas kan tinampo maging mga motorista alagad dai mapahale an ulang na vehiculos sa gilid na tinampo na pwede pang agihan huli ta natatahoban sinda kan mga ulang na poste.

Pinalakbang na tinampo ginibong garahihan. (DA)

Si Renne Gumba, jefe kan PSO nagsabi na makakatabang sa bulos kan trafico an mahiwas na tinampo alagad an problema iyo an mga poste.

Sa Casureco II, sinabi ni spokesperson Rinner Bucay na 47 mga electrical post sa Peñafrancia Avenue an saindang pighahandaan an relokasyon alagad hinahalat ninda an fondo hale sa obras publico.

An kadificilan naman iyo an paghobo kan mga poste huli ta makakalaog sa pribadong lote na kaipuhan igwang pagtugot an kagsadiri kan propriedad.

Sinabi pa kan Casureco II si enot na mga natapos na road widening project kan DPWH sa barangay San Felipe, Magsaysay Ave. M.T. Villanueva mahiwas na an tinampo kasunod kan pag-relocate tolos kan mga poste.

Kun mayong problema sa relokasyon madaling magamot an poste, sabi pa.