Pinaka Dakulang Deportasyon sa Amerika

Sa maabot na Enero 20 mangyayari an inagurasyon kan bagong binotong presidente kan America na si Donald J. Trump. Duwang bagay an pig promesa niyang papakarayon sa America sa primero niyang aldaw sa pwesto – an problema kan mga illegal na immigrante asin an ekonomia manungod sa marahal na barakalon sa pag buhay buhay kan mga ordinaryong tawo sa Amerika.

Segun sa bagong pamayo kan immigrasyon sa Amerika na ina apod na “Border Czar” na si Tom Homan, ma poon man sa aldaw na ini an pag dakop asin pag deporta kan mga illegal na migrante sa America.

Enot daa nindang dadakupon asin ededeporta itong mga illegal na migrante na may mga record na krimen.

An sabi kan opisina kan Immigrasyon, Border asin Customs kan America igwa nin mga labing 58,600 na mga sentensiadong kriminal o may mga pending na kaso sa ciudad sana kan New York.

Dae pa kabale igdi sa mga criminal na ini si mga sentesiadong mga illegal na naka istar sa ibang estado o ibang parte kan America.

Dakul sa mga kriminal na ini an mga miembro kan mga tinatakutan na mga gang na hali sa ibang lugar kan kinaban arog kan mga MS 13 na nag gikan sa El Salvador asin an Tren de Aragua kan Venezuela.

An sabi kan ibang autoridades dae pa ngani daa nakabali sa mga numerong ini si mga dae naka record o dae na report na mga krimen na nangyayari o nangyari.

Kabali sa mga kasong ini an mga rape, prostitusyon, pag kidnap, pag habon, pag maltrato sa mga pulis, pag gadan sa ibang tawo, pag pabakal asin pag transporta kan fentanyl asin iba ibang delikadong droga, asin dakul pang kaso. Kadakul nang mga Amerikano an nagadan asin nagagadan sa drogang fentanyl. Iyo daa ini an saro sa pinaka makamandag na droga. An sabi kan mga eksperto sa droga an kadikit lang kaini na arog kan kabanga lang kan tipasi kan sarong bagas makaka gadan na nin dakul na tawo.

Kan sarong aldaw nasa bareta si sarong illegal na miganteng nag gadan nin sarong estudyante sa Universidad kan Georgia. Jose Ibarra an pangaran niya. Miembro kan gang na Tren de Aragua ining si Jose na nag gadan asin nag pasakit sa estudyante na si Laken Riley an pangaran. Saro si Laken na debotong kristyano asin estudyante nin nursing.

Nag laban si Laken duman sa gusto mag rape saiya nin 18 minutos pero pinokpok siya nin gapo sa payo sagkod nagadan. Si nag gadan ki Riley sarong illegal na migrante na nag laog sa border kan Texas asin nagpa siring sa New York. Na aresto siya sa New York sa ibang kaso pero pina laya siya. Tinawan siya nin libreng pamasahe sa eroplano kan gobyerno nganing mag balyo sa Georgia ta yaon duman naka istar si mga amigo niya. Kan aldaw na itong nagadan si Riley nag sabi daa ini si Jose Ibarra sa mga amigo niya na ma hunting siya nin babae duman sa parkeo kan Unibersidad kan Georgia. Na sentensyahan na si Jose Ibarra kan sarong aldaw. Dakul pa daang mga krimen na arog kaini an nangyayari asin dakul nang tawong naaangot ta dae man daa ito si Laken Riley magagadan kun mayong “open border”.

An pag deporta kan mga illegal na migrante sa America iyo an primero sa listahan ni Trump kan si nag kakampanya siya. Mayoriya kan mga Amerikano nagboto saiya ta gusto kan tawo mawara an problemang ini. An ika duwang gusto kan tawo iyo an pag pakarhay kan ekonomiya nganing mag baba an barakalon kan mga grocery kan mga ordinaryong tawo sa Amerika. Nag promesa si Trump na papakarayon niya man ini tulos

Kan pag presidente ni Biden, ginibo niya an Amerika nin inaapod na “open border”. Pina laog niya an mga illegal na migrante sa mga boundery kan Amerika. An saro sa mga resulta kaini iyo man an pag laog kan mga kriminal na hali sa ibang nasyon. Bako sanang mga kriminal na may mga record na sa mga nasyon ninda kundi dakul man na mga naka laog na mga terorista na suspetyado na kan mga autoridades kan Amerika. Kadakul pang ibang problema an naging resulta kaining ginibo kan gobierno ni Biden. Kaya ngunian, sa primerong aldaw kan pag tukaw ni Trump, tulos tulos na pupunan niya na an deportasyon.

Sa ngunian dakul na tawo sa kinaban an nag aantabay kun anong mangyayari sa Enero 20. May mga organisasyon asin mga politico man na mga kontra sa dakulang deportasyon na gigibohon na ini kan gobyerno. Totoong herak man kan mga pamilyang ma aapektohan kaini pero porsigido an bagong gobierno ni Trump na gibohon ini para sa karahayan kan Amerika.

Man laen laen na debate an nangyayari ngunian manungod sa mangyayaring ini. Ipangadye ta na lang na mayong dakulang karibokan na mangyari asin maging organisado asin civil an pag implementar kaining mga deportasyon na ini. Sa presente kadaklan kan tawo sa Amerika nag uuyon na an mga kriminal na mga migranteng illegal dapat ma deporta.