Pinakahuben na alkalde sa Bicol santaon na sa puwesto ngonian

Ni Sonny Malate

Lagonoy, Camarines Sur --- Kan Junio 30, ngonian na taon, eksaktong santaon na sa puwesto si Alkalde Dyego Luiz H. Pilapil,  edad 23 años, pinakahuben na local chief executive sa Bikol, asin ika-duwa sa bilog na nacion.

Sa pagtapos  kan  primerong taon bilang alkalde, para  ki Pilapil halohalong emosyon an saiyang namamatean. Pinakaurog digdi iyo an kaogmahan asin agyat sa tahaw kan magkahalong  pagduda asin halangkaw na paglaom kan kadaklan sa saiyang capabilidad  bilang sarong huben na servidor kan banwa.

Maroromdoman na durante kan karampanyahan  para sa pirilian kan taon 2025,  nagin isyu kontra ki Pilapil an  dapit sa saiyang edad. Sa mga may sa gugurang asin agit-agitan  na kaisipan, an saindang  pagtubod an pagigin huben sarong kaluyahan para sa sarong lider.

Sa lado kan kaito aspirante sa pagigin servidor kan banwa, pig-asertar  niya an kaisipan na bakong kaluyahan an pagigin huben  sa pagkapot kan ano man na katungdan  sa gobyerno. Ini nagserbing agyat asin motibasyon  sa saiya na ipursigi an pagigin toltol, marhay asin efectibong  lider kan banwa. 

Ngonian na saro nang elehedong oficial, namamate ni Pilapil na dakula mananggad na agyat sa sarong huben na lider an magkaiguang hararom na kaaraman asin abilidad bilang ama kan banwa.

Sinda an  naglalaom na an sarong huben na oficial may  progresibong kaisipan,  frescong pananaw sa paggogovernar asin iguang positivong  ikakacontribuer na bagohon an tradisyonal asin maating sistema sa politica.

Sa tahaw kaini, mawot niya na tawan kan namamanwaan  an lider na pareho niya nin tiwala asin suporta na magibo ninda an pigpupursiging mga  nababagong perspectivo dapit sa estilo nin liderato asin paggogovernar sa atubang kan presenteng kamurugtakan asin pangangaipo kan comunidad. 

Katakod kaini,  si Pilapil nagin sarong miembro kan Mayors for Good Governance (M4GG). Siya nagtutulod kan advocacia kan grupo sa marhay na sistema sa gobyerno asin pagsustenir kan principio sa pagpaurog kan  interes kan publico kontra sa corruption asin mayong kamanongdanan na klase nin  politica.

Sa primero man na taon kan huben na alkalde naguno kan local na gobyerno an nagkakapirang award, kairiba na digdi an Seal of Good Financial Housekeeping gikan sa Department of the Interior and Local Government (DILG).

Sa mga proyectong pig-initiar  sa saiyang enot na taon, ogma asin orgulyo an alkalde sa mercado publico na padagos na pigcoconstruir ngonian. An proyecto na 40 porciento nang nahimo may naialocar nang Nubenta Milyones (P90M) gikan sa oficina ni Cong. Arnie P. Fuentebella. 

An facilidad na haloy nang pangaturogan kan mga Lagonoyon pighihiling na dakulang contribuente sa pagrambong kan economia asin dagdag ingreso sa revenue kan Lagonoy na ngonian saro nang 1st class municipality.

Apwera kaini, naconsiger man an birthing home asin animal bite center  para sa servicio medical. Para sa mga kapareho niyang  huben pigcoconducir man an mga sports activities sa irarom kan programang Developmental  League of Players. Obheto kaini an mag-asenso sa isports asin itulod  an toltol na ugali kan hubenes.

Duwa man na escuelahan sa secondarya sa barangay Sipaco asin Bocogan  an pigconstruir tanganing masimbagan  an programa sa edukasyon sa North  Coastal na parte kan banwa. 

Pigbuyagyag pa kan alkalde na mga proyectong water system, farm-to- market roads asin nagkakapira pang infrastractura an nahaman gikan sa local na fundo. Apwera kaini, may mga nakalinyada pang mga proyektos sa mga masunod na bulan.

Totoo mananggad, an isyu bako sa edad kundi sa abilidad!