top of page

PINAPABORAN NI VP SEC SARAH DUTERTE, COMELEC: Voter education kabali na sa K to 12 curriculum

Virac, Catanduanes --- Pinapaboran kan Department of Education (DepEd) asin Commission on Election (Comelec) na ipasunod sa iba pang mga provincia an pag-ayon kan voter education sa K to 12 Curriculum na nagsikad na sa provinciang ini.


Ini an mga pahayag sa Bicol Mail ni DepEd Regional Director Gilbert Sadsad sa paagi nin text message kasunod kan pig-iimplementar na proyecto kan Comelec Provincial Office sa Catanduanes, DepEd V, asin SDO kan kaparejong provincia sa pagsaro kan voter’s education sa K-12 curriculum.


An sinambit na programa inumaw huli ta dakulang bagay an pagsasaro kan Voter Education sa K to 12 Curriculum. Pigreconosir kan Comelec national office, DepEd national Office asin stakeholders an opisyales kan sinambit na mga ahencia digdi sa Bicol sa ginibong actividad sa Sofitel Philippine Plaza Manila kan Marso 9 durante sa ginibong 2023 National Election Summit.


Sa text messages sa Bicol Mail ni Director Sadsad sinabi kaini ‘‘That’s what we heard from Comelec, si VP Secretary Sarah Duterte naman nag-manifest na welcome niya an integration’’


Nagkaperang mga lideres, stakeholders, asin mga interesadong grupo para sa election nagparticipar sa sinambit na summit. Inatendiran ninda Comelec Chairman George Erwin Garcia, asin mga Comelec Commissioners, mantang si VP DepEd Secretary Duterte presente sa okasyon na nagtao man kan saiyang mensaje na nagpapabor kan importancia kan ‘‘voter education integration in the curriculum’’.


Si Sadsad nagsabi an saindang proyecto kan SDO asin Comelec nganing idagdag sa curriculum mahalaga sa edukasyon kan mga estudiantes.


An ideya nagpoon sa tema kan ‘‘right to vote’’ sa paagi ni Atty. Maria Aurea C. Bo-Bunao, Comelec regional director, Provincial Education Supervisor sa saindang report mapadapit sa ‘‘Module on Guide for Youth Voters: A Voters Education Program in Virac, Catanduanes’’. An kaparejong proyecto narealisar sa panahon ni RD Atty. Maria Juana Valeza kan Comelec V na nagtukdok kan integridad sa pagpili nin mga lider sa nasyon sa mga joven pang edad. (DPAureus)

コメント


bottom of page