PIRILIAN SA BRGY, SK DAGOS-COMELEC: Comelec CSur padagos sa pag-andam kan BSKE

An mga election officers sa Camarines Sur padagos kan saindang ginigibong preparasyon para sa maabot na Barangay asin Sangguniang Kabataan Elections (BSKE) sa Deciembre 1, 2025 sa tahaw kan pagtubod kan ibang mga opisyales de barangay na sinibog na kan congreso sa 2026.

Ini an piglinaw ni Atty. Noriel Badiola, Provincial Election Supervisor kan Comelec sa Camarines Sur nin huli ta sagcod na mayo pang pinipirmahan na ley si Presidente Ferdinand Marcos Jr, padagos an saindang mga ginigibong pag-andam mala ngani pigtalaan na an voters registration sa Hulyo 1 hasta Hulyo 11, 2025.

Kan nakaaging midterm elections an provincia iguang 1.3 milyones na rehistradong botantes.

An pagtubod na i-uuktaba an BSKE huli sa nagluwas na report na lusot na sa Bicameral-Conference Committee an pag-uktaba kan pirilian sa barangay asin SK sa 2026.

Sinabi kan Comelec Camarines Sur sagcod na dai pa pinipirmahan ni Marcos an ley sa pag-uktaba kan pirilian magpapadagos an saindang preparasyon.

Kun maaprobaran an propuestong ley an termino kan mga opisyales de barangay gigibohon nang apat na taon asin pwede pang mag-re election mantang an SK sarong termino sana.

Ribong na an mga opisyales de barangay maging kan may ambisyon na magcandidato huli ta haros cada bagong congreso asin madale na an BSKE na-uktaba kan pirilian mala ngani an termino sa presenting komposisyon sagcod sana sa duwang taon.