PIRIPIT NA NATONG

Tigsik ko si Mado Malasado

Madaling mag-init an kaldero

Ginatungan nin basang sungo

Kan naluto nagin inaburido!

Tigsik ko si Malou Maluto

Dae nakukua an tamang hiro

Nagsapna, nagparamotomoto

Naluto, malagtok, mahibog an tipo!

Tigsik ko man ining dinailan

Sakuyang kinamot, pignamitan

Ano nang siram, abaa na yan!

Ini na garo an kamurawayan?!!!

Tigsik ko si Mang Tulome

Aw num, nanganaan nin aligi

Biglang luminompat an saiyang BP

Bagsak sa hoapital, naremate!

Tigsik ko an Kamlon sa barangay

Mayo man ambag sa irinoman

Alagad solid an hambog sa istoryahan

Pirmi pang omok-omok kan pulutan!

Tigsik ko an piripit na natong

Maurag pampahingaw ki Totoy

Nabuyong bakong sa sobrang inom

Kundi sa pahingurag na pagsomsom!