Pito na gadan sa casong dengue

Pito na gadan sa casong dengue sa Bicol poon kan Enero 1, 2024 hasta Hulyo 13, 2024 na igua nang total na 715 caso ngunian na taon kumpara sa 512 caso na naglangkaw nin 40 por ciento sa kaparejong peryodo kan 2023.

Ini an pinaluwas na datos kan Department of Health Bicol Center for Health Development (DOH Bicol CHD) sa tahaw kan saindang patanid sa mga barangay na iimplementar an kalinigan sa saindang kapalibotan sa paagi kan practice 4S o ‘‘Suyurin at sirain ang pinamumugaran ng mga lamok, Sarili ay protektahan laban sa lamok, Sumanguni agad sa pagamutan kapag may sintomas ng dengue, Sumuporta sa fogging/spraying kapag may banta ng outbreak’’.

Causa sa paglangkaw kan caso huli ta panahon nin tag-uran na dapat maging atesbado an mga magurang nganing ilikay an saindang familia sa helang.

An mga provincia igua nang binawian na pasyente; sa Camarines Sur – 1; Catanduanes – 2; Sorsogon – 3; asin Ciudad nin Legazpi – 1. An Camarines Sur igua nang 248 caso; Camarines Norte – 170 caso; Catanduanes – 121 caso; Sorsogon – 62 na caso; asin apat pang caso sa ibang lugar na dai na nginaranan kan DOH.

An ahencia nangapudan sa publico na magtarabangan o magparticipar sa dengue prevention and control.