Pito naman na brgy sa CSur pigdeclara komo drug-cleared

Pito naman na barangays an pigdeclara bilang ‘‘drug-cleared’’ sa Camarines Sur mientras na 73.56 por ciento na sa bilog na provincia.

Alagad sinabi ni PCol Virgilio Olalia, Jr. Provincial Director kan PNP na dakulang bagay an suporta kan manlaen-laen na LGUs, comunidad, opisyales de barangay asin iba pang sektor nganing masakat na ninda sa 73.56 por ciento an acomplisimiento sa campanya laban sa ilegal na actividad.

An pagkakasararong ini kan mga ahencias komo pagpadagos na maging epektivo an paglaban sa problema sa droga.

Segun pa sa provincial director an drug-cleared barangay kinababalihan kan San Antonio Poblacion (Calabanga) Baliuag Nuevo (Minalabac), San Antonio (Ocampo), Panaytayan Nuevo (Ragay), Santa Cruz (San Fernando), Mampirao (San Jose) asin Manangle (Sipocot) mantang an Barangay Sta. Justina sa Buhi asin Barangay San Pedro sa Ciudad nin Iriga nasa listahan para sa retention sa drug-cleared status.

Sunod-sunod an mga acomplisimiento kan Philippine Drug Enforcement Agency (PDEA) asin PNP huli sa suporta kan publico na nagtataong positivong impormasyon nganing matalikop an mga suspek na envuelto sa droga.

Orgulyo kan PNP Camarines Sur an saindang halangkaw na acomplisimiento mantang an ilegal na droga saro sa mayor na nagiging dahilan nin mga krimen.