Plastic-free workplace pigbubusol kan local na gobyerno
- 24 hours ago
- 2 min read
Ni Sonny Malate
Sarong pambihirang advocacia an pig-initiar kan local na gobyerno kan Goa, Camarines Sur katakod kan celebrasyon kan Nutrition Month 2026 na may temang "Nutrisyon at Kalikasan ating Pangalagaan."
Enot sa distrito kan Partido asin posibleng sa bilog na probinsiya, an advocacia inapod na ''Plastic-free Workplace Challenge." Ini gikan sa kaisipan ni Joy Raizza P. Ramos, Municipal Nutrition Officer. An competition pigparticiparan kan pitong oficina na sakop kan local na gobyerno.
Nagin ganador iyo an Goa Community College (GCC) na pinapamayohan ni Dr Nita V. Morallo. Saro sa mga significanteng panundon dapit sa basura digdi an dae pagtaltag nin basurahan sa saindang edifico asin campus
Imbis, an mga estudiantes asin personahes digdi pigbubulsa o piglalaag sa bag an saindang basura asin pig-aapon sa ibang lugar. An GCC saka ibang ganador nakarecebi nin premyong kuwarta asin certifico.
Segun ki Ramos, an idea niya may relasyon sa danyos na daradara kan plastic sa kapalibotan asin mismong salud kan katawohan. Manonotaran na an plastic halawig na panahon antes nalalapa kaya dakolang perwisyo sa salud asin kapalibotan.
Naoogma man siya na bilog an suporta ni Alkaldesa Raquel S. Lim sa advocacia ninda sa paagi nin pag-alocar nin fundo para sa saindang propuesto Siring man, ki Bise Alkalde Marcel Michael P. Pan asin sa personahes kan RHU sa pamamayo ni Dr. Mario T. Pan III.
Apwera sainda, suportado man sinda Jhean T. Santiago, DOH PDO CamSur, Joflorenn Krestel B. Regalado, Provincial Nutrition Coordinator, Local Health Board asin Municipal/Barangay Nutrition Council.
Huli sa positibong pagresponde kan mga empleado sa advocacia mawot man ni Ramos na darahon ini sa mga barangay kun saen mas dakol an naggagamit kaini sa aroaldaw.
Katakod kaini, sinabi ni Joseph Abella, Sanitary Inspector, na handa an saindang oficina sa pagpautob kan mga panundon dapit sa tamang pagmanehar kan programa dapit sa basura, orug na an mga plastic na material na gamit sa harong, saod mga tindahan asin ibang lugar.
Naglalaom si Abella na sa cooperacion kan mga namamanwaan, ano man na advocacia kan gobyerno para sa karahayan kan kagabaan an maggigin matrayumpo.
Manonotaran na sa ngonian, an dae paggamit nin plastic pigpapautob na sa mga mall, hospital, department store asin ibang establisimento comercial. Imbis, an pigagamit mga eco-bag o paper bag na puwedeng i-recycle asin madaling malapa.
Mientrastanto, an gobyerno nacional nagmamando man kan tamang pagmanehar kan basura sa paagi kan RA 9003 o Ecological Solid Waste Management Act of 2000. An ley nagsusugo sa mga LGU na maghimo asin mag-imlementar kan 10 años na waste managementl plan.
An RA 11898 o Extended Producer Responsibility Act of 2022 nagsusugo man sa darakulang fabrica asin negosyol na magrecover asin recycle kan saindang maaating ragpa kan plastic packages.
Dagdag pa digdi an RA 9160 o Local Government Code of 1991 nagmamando sa mga local na gobyerno na magpasar asin implementar nin mga local na leyes dapit sa tamang disposition kan basura tanganing mapangataman an salud asin kapalibotan.
Comments