Plazo sa booster dose kan DILG sa LGUs kaya kan Naga
Nagpaluwas nin directiva an Department of Interior and Local Government sa mga lokal na gobierno saka iba pang ahencia na suportaran an Presidential Directive on Covid-19 vaccination sa laog kan enot na sangatos diyas, sa Ciudad nin Naga enot nang nagpapadagos kan saindang ginigibong booster vaccination nganing dagos nang makahawas an alert level.
An memorandum kan DILG petsado Agosto 18, 2022, alagad an City Hall amay pa kan Agosto 2022 padagos kan saindang vaccination program mala ngani sa ngunian igwa nang 49 por ciento an natudokan kan booster shot.
Si Consejal Sonny Rañola, Chairman kan Committee on Health sa Sanggunian Panlungsod nagsabi mantang sobra na sa numero kan herd immunity an mga bakunado base sa populasyon sa 27 barangay kan ciudad nagsikad tolos an City Health sa campanya sa booster shot puon sa nag-eedad nin dose anyos sagcod sa senior citizens.
Huli kaini, nagtutubod an Consejal na kakayahon kan ciudad an tinaong plaso kan DILG sa booster vaccination para sa senior citizens asin nag-eedad nin 12 hasta 59 anyos.
Sinabi sa memorandum kan DILG, kaipuhan 90 por ciento kan senior citizens asin kisiera 50 por ciento kan nag-eedad nin 12 anyos hasta 59 anyos na dapat natudokan na sinda nin booster antes kan Oktobre 1, 2022.
An vaccination rate iyo an papasikadan sa paghale kan alert level system saka estrictong implementasyon sa pagsulot nin face mask sa sarong lokalidad o sa pagdeklara kan Covid komo endemic.
Afuera kaini, an City Hall nagpatanid na dapat an maatendir sa mga actividades siring kan gigibohon na traslacion asin fluvial procession, Miss Bicolandia Pageant, civic asin military parade maging sa mga maatendir sa mga misa sa simbahan, natudokan nin booster dose.
An vaccination site ginigibo sa JMR Coliseum asin sa ibang mga simbahan nganing pagluwas sa misa puede nang magpatudok.
Nagpasalamat man si Consejal Rañola sa grupo kan assistant city health officer Ronnie Amoranto, pamayo kan Vaccination team maging sa mga Barangay Health Workers asin opisyales de barangay sa advocacia sa mga residentes na dapat magpabakuna contra sa Covid-19.
An Ciudad nin Naga iyo sana an namantenir an alert level 1 sa Bicol sa laog na nin nagkaperang bulan. (dpa)