PNP andam na sa duwang okasyon kan simbahan

Andam na sa pagmantenir kan paz y orden an 5,000 personahes hale sa manlaen-laen na ahencia nin awtoridad sa duwang okasyon kan simbahan para sa ika-100 taon na anibersaryo kan pagka-korona canonica ki Nstra. Sra. de Peñafrancia bilang Patrona kan Kabikolan sa Septiembre 20 asin tradisyonal na Fluvial procession sa Septiembre 21.

Papangenotan ni BGen Andre Dizon kan PRO 5 saka ni Col. Erwin Rebellion, City Director kan Naga City Police Office an superbisyon sa 3,200 na kapupulisan asin katuwang an iba pang mga ahencia nin awtoridad nganing maseguro an seguridad sa okasyon na maruso an labi sa on milyon na debotos ni Nuestra Señora de Peñafrancia.

Sinabi ni Dizon magiging higot an saindang seguridad nganing maseguro an paz y orden siring kan nagtapos na Traslacion prusisyon.

An duwang halangkaw na opisyal kan PNP naglibot sa saindang binugtak na mga Police Assistance Desk saka sa mga estratihicong lugar sa pagseguro na parating naka-alerto an saindang personahes mantang ribo-ribo an mga bisita sa Ciudad nin Naga.

Sa limang ribong mga awtoridad sa ciudad nagtutubod an PNP na mangyayari man giraray an matuninong na paz y orden.

Padagos na maheheling an mga police visibility sa simbahan, sentro de negosyo, terminal, pagmantenir kan trafico asin bako lang sa duwang dakulang okasyon kan simbahan.

Liwat papangenotan ni PRO 5 BGen Andre Dizon saka NCPO City Director Col. Erwin Rebellion an superbisyon kan kapupulisan sa gigibohon na ika-100 taon na anibersaryo kan pagka-korona canonica ki Nuestra Señora de Peñafrancia asin Fluvial procession nganing maseguro an seguridad sa duwang okasyon kan simbahan.