top of page

PNP CS nagsusuporta sa amnestiya, peace talks

An PNP Provincial Office kan Camarines Sur nagsusuporta sa pighihimong peace talks asin amnestiya kan gobierno sa mga dating miembro kan CPP/NPA/NDF tanganing magkaigwa na nin tunay na katuninongan sa nasyon.


Sa entrevista kan Bicol Mail ki P/Capt Marlon Lladoc, opisyal na parataram kan PNP Camarines Sur nagsabi na an bilog na kapupulisan kan provincia nagsusuporta sa programa sa amnestiya asin pagbuhay liwat na peace talks sa pag-ultanan kan Government of the Republic of the Philippines (GRP) asin National Democratic Front of the Philippines (NDFP).


Sinabi pa na ano man na desisyon ni Presidente Ferdinand Marcos Jr. sa isyu sa pagbuhay liwat kan peace talks saindang suportado.


Igwa nang propuestong bill sa pigtutulod na peace talks sa Camara-Baja alagad nagpapadagos pa an deliberasyon.


Digdi sa Camarines Sur igwa nang pighahasing localized peace talks alagad sa mga napiling limang mga municipalidad na kinababalihan kan Caramoan, Tinambac, Presentation, Lagonoy asin Garchitorena. An mga banwaan na ini base sa AFP intelligence Council report na nagkukumfirmar sa 37 mga barangay digdi na igwang presencia kan CTGs.


An office of the Presidential Adviser on Peace, Reconciliation and Unity (OPAPRU) nagkunducir na nin duwang aldaw na training session sa pigtutulod ni Presidente Marcos na peace initiatives. Alagad nakatutok para magkaigwa nin localized peace agreement. An mga napiling lugar para sa sinambit na peace talks iyo an sinambit na limang municipalidad kan Partido area.


An training pinangenotn kan OPAPRU Local Conflict Transformation-Field Implementation Support Unit sa pamamayo kan Officer-In-Charge Paul Esober nganing makahimong uralay entre kan representant kan gobierno asin activong CTGs asin sa saindang suporta.


Objetivo kaini para sa urulay na prayoridad an problema pang comunidad, kontribusyon sa marhay pang-gogobierno asin isyus sa insurhencia. (dpa)



Manga kapupulisan sa Camarines Sur sa pamamayo ni PD Col. Julias Caesar Domingo nakaandam kan saindang tropa nganing maseguro an katuninongan sa pagsabat kan bagong taon. Alas 5:45 nin agang amay nagkaigwa sinda nin ‘’formation and accounting of personnel’’. (PPO CSur)


bottom of page