PNP CSur ‘‘Best PPO’’ sa Bicol

An Philippine National Police Provincial Office (PPO) kan Camarines Sur iyo an napiling ‘‘Best PPO'' sa rehiyon Bicol base sa evalusyon kan taon 2024 asin 2025.

Sa ginibong press conference kan Martes, Febrero 3, 2025 sa Camp Colonel Juan Q. Miranda, Concepcion Grande, Ciudad nin Naga, si Provincial Director P/Col. Virgilio Olalia Jr. nagkumfirmar sa prensa na pigbasehan kan Bicol PNP an saindang mga acomplisimiento kabale mga an operasyon, maging sa lado nin administrativo asin ‘‘impact of community’’.

Laen pa kaini, namidbid internasyonal an PPO CamSur kasunod kan pagkakapili ki M/Major Inar Vic Florece komo Top 1 sa 52 international student officers sa ginibong International Police Exchange Program sa Abu Dhabi Police College. Digdi naheling asin nabantog an marhay na acomplisimiento kan PPO Camarines Sur bilang mga professional na awtoridad.

Orgullo man kan mga miembros kan PPO sa dakulang onra na narecibe ni Major Florece na jefe de pulisya sa sarong Municipal Police Station sa Camarines Sur.

An Camarines Sur sarong matuninong na lugar alagad kun igua man nangyayaring kriminalidad mga isolated sana asin menor na caso.