PNP CSur naka-alerto sa semana santa

Nasa full-alert an Philippine National Police Provincial Office (PPO) kan Camarines Sur ngunian na panahon nin semana santa alagad saro sa magkakaigwa nin higot na seguridad iyo an Municipal Police Station (MPS) sa Calabanga, Camarines Sur sa tahaw kan ribo-ribong devotos kan Amang Hinulid an madalaw poon Miercules, Juevez asin Viernes santo.

Si PNP Provincial Director Col. Julius Cesar Domingo nagpaluwas nin directiva sa gabos na MPS na maghaman kan saindang security plan ngunian na semana santa.

Saiya pang sinabi na bentaje na igwang security plan nganing preparado an MPS asin pag-responde kan dugang na pulis hali sa PPO kun igwang emerhencia.

Lambang municipalidad igwang actividades an simbahan catolico na yaon digdi an mahibog na mga devote bako lang kan Amang Hinulid maging iba pang mga santo.

Alagad segun pa sa pamayo kan PPO saro sa tututokan kan kapupulisan sa pagmantenir kan paz y orden iyo an pigdadayong milagrosong Amang Hinulid sa banwaan nin Calabanga mantang mapadara sinda nin augmentation force. Maging sa iba pang MPS papadarahan pa nin dagdag na kapupulisan nganing maseguro an katuninongan.

Paglaog sana kan Miercules santo ribo-ribo na an malakaw penetencia hali sa mga banwaan kan Camarines Sur maging iba pang lugar.

Si Alcalde Eugenio Severo nagsabi na magkakaigwa sinda nin re-routing sa mga vehiculos pasiring sa Barangay Salud mantang yaon digdi an Kapilya kan Hinulid. Sasarahan sa trafico an pasiring sa Barangay Salud na igwang idedestinong traffic enforcer an MPS katuwang ninda an miembros kan Brgy. Tanod.

Segun pa sa jefe ejecutivo mawarak sinda nin mga bugtakan basura orog na sa aagihan kan lakaw penetencia pasiring sa Kapilya kan Hinulid.

An lakaw penetencia tradisyonal nang ginigibo sa Amang Hinulid.

Sa lado kan Barangay Council kan Barangay Santa Salud nagbugtak nin mga CCTV camera sa zona pasiring sa Kapilya.

Bako lang an panahon kan semana santa envez pagtao pa nin seguridad sa piglalaoman na pag-arabotan nin turista.

Madestino pa nin mga pulis na mapatrolya sa hotels, aeropuerto, pantalan, terminal maging sa beach resort.