PNP CSur preparado sa surprisang inspeksyon kan bagong reg’l director

Nakaalerto an PNP Provincial Office kan Camarines Sur maging an mga Municipal Police Stations sa liderato ni Provincial Director Virgilio Olalia Jr. ano man na oras na magsurprisang inspeksyon si PRO 5 Regional Director Police BGen Nestor Babagay siring kan saiyang pigponan sa nagkapera nang MPS sa Albay.

Si Olalia igua nang direktiba sa mga jefe de pulisiya kan MPS na dapat maging alerto sa saindang trabajo bilang awtoridad bako lang sa suprisang inspeksyon kan regional director.

Sinabi ni Babagay an saiyang pag-inspeksyon nganing maseguro na sinda pirming preparado sa ano man na operasyon sa lado kan serbisyo asin paz y orden bilang mga awtoridad, an ginigibong pag-record sa police blotter. Laen pa kaini, pig-aaraman an patrol plan, maaraman an personnel deployment nganing macierto an presencia kan mga awtoridad sa mga matawong lugar siring kan commercial district asin sa barangay.

Pinagirumdum kan jefe kan Bicol PNP kan saindang dapat tawan nin importanteng misyon kabale na an orden ni PNP Chief Gen Nicolas Torre III mapadapit sa ‘‘5 minutes response time protocol’’ na digdi madedeterminaran an saindang serbisyo sa comunidad.

Kabale sa prayoridad kan bagong RD iyo an kampanya laban sa ilegal na droga asin direktiba sa kapupulisan sa Kabikolan na dapat matalikop na an mga ‘‘wanted criminal’’.

Si Babagay ito an nagribay ki dating RD BGen Andre Dizon na destino na bilang jefe kan PNPA sa Ciudad nin Cavite. An bagong RD tubong Ciudad nin Iriga digdi sa Camarines Sur.