PNP dai makikiaram sa Oplan Baklas kan Comelec

An Commission on Election (Comelec) liwat nagbuelta kan saindang Oplan Baklas kasunod kan pagsikad kan campaign period sa mga candidato lokal kan Marso 25 alagad an Bicol PNP nagcierto na igwa sindang personajes na pinapadara bilang police assistance na an saindang trabajo pagtao nin seguridad dai makiaram sa pagbaklas kan campaign propaganda nin arin man na candidato.


Ini an directiva ni Brig Gen. Jonnel Estomo sa kapupulisan na madedestino sa ilalansar na operation baklas kan Comelec na an iba nagpoon na kasoodma asin magpapadagos sundo sa enot na semana kan Abril.


Sinabi ni Police Major Malou Calubaquib, opisyal na parataram kan Camp Semion Ola kan PNP na malinaw an tinaong directiva sa kapupulisan magtao sana nin seguridad sa grupo kan oplan baklas dai makiaram sa pagbaklas nin tarpaulin o ano paman na campaign propaganda kan candidato lokal o nasyonal.


Nagkaigwa nin isyu nasyonal sa pagbaklas nin darakulang tarpaulin nin candidato sa laog kan pribadong propriedad na nangyari sa Isabela asin pigcuestion sa jusgado an naging lakdang kan Comelec asin PNP na nakiaram sa trabajo kan commission.


Nagpatanid an Bicol PNP sa mataong asistencia sa oplan baklas na likayan an magkapot nin campaign propaganda envez an saindang trabajo magtaong seguridad sa personajes kan commission mga kaibanan na ahencia asin volunteers.


Si Comelec regional director Rafael Olaño nagpahayag na kabale sa dapat tanggalon iyo an mga darakulang campaign propaganda na sobra sa sukol, mayo nakalaag sa designadong common poster area, electrical post kan cooperativa nin electricidad, school building asin propriedad kan gobierno.


Kabale sa grupo iyo an personajes kan Bureau of Fire Protection, CENRO Office kan LGU na iyo man an mahale kan mga tarpaulin na pinako sa mga poon nin kahoy. (dpa)