PNP Goa prioridad an pagpautob kan regulaciones sa trafico

Ni Sonny Malate

Pigpahayag ni PCPT Jeson Max F. Barcenas, Officer in Charge kan Goa Municipal Police Station (MPS) na prioridad kan hepatura ninda  an pagpautob kan mga  regulaciones dapit sa trafico.

Segun  ki Barcenas, nanotaran niya kan pag-asumer niya bilang OIC kan station kan Junio, an overloading sa mga vehiculo, dae paggamit nin full-face helmet asin an colorum na mga vehiculo.orug na sa centro kan banwa. 

Pigbuyagyag kan OIC na kan nakaaging bulan  nagkaigua sinda nin dialogo ni Konsehala Hanna Broqueza kan Sanggunuang Bayan Goa dapit sa traffic code kan LGU kun saen nagtao siya nin mga dae naibaleng provisiones. 

Naobservaran ni Barcenas an kawaran nin driver's license kan dakol na mga nagpaparuhab nin motorsiklo asin mga paso nang rehistro kan mga vehiculo  sa Land Transportation Office (LTO).

Pigbanggit man niya  na sa presente, iguang limang pulis an station na pigdeputize kan LTO. Ini dakulang tabang sa pagkakaigua nin pusog na ngipon sa pagsitar asin imponer nin sanction sa mga nagbabalga kan mga ley sa trafico.

Dapit sa haloy nang existidong situacion sa Centro kun saen dakol na mga motorsiklo, tricycle, dyip asin iba pang vehiculo na naka parking  sa bambangan kan mga edificio comercial, segun ki Barcenas an Goa PNP naghahanap nin tamang lugar para maparkingan kan mga sakayan.

Base sa existidong panundon, an mga vehiculo igua sanang singko minutos para  magtiner sa atubangan kan establisemento comercial. An pagparada kan mga vehiculo digdi sa halawig na oras  nagigin causa kan pitsidong tinampo. 

Sa presente, an LGU iguang Traffic Enforcement Management Office (TEMO). An mga personahes digdi kun nagfufunctionar nin regular, tama asin maigot dakolang kageanan sa pagmanehar kan trafico sa Centro asin ibang stratehikong lugar.

Dapit sa mga motorsiklo na sobra an tanog kan tambutso, sinabi ni Barcenas na nakicoordinar na siya sa LTO kun paano magksigua nin decibel meter na gamit pansukol sa tanog kan motorsiklo. Piglalaoman na masisimbagan kaini an isyu sa pagtaong penalidad sa mga pasaway na motorista.

Sa mga e-trike na ipinagbabawal na sa national highway, segun sa OIC, an mga drayber kaini pigkakaulay ninda dapit sa existidong policia dapit digdi. Manonotaran na sa dakol na parte kan nacion, saro ini sa pigpapasunod na defecil iimponer.

Mientrastanto, an Goa Municipal Police Station an naglalatag nin regular na checkpoint asin "Oplan Sita" para sa pagpautob kan mga regulaciones sa trafico. Si Barcenas an  nangapodan sa publico  na makipagtabangan sa sainda dapit digdi asin iba pang panundon para sa katrangkilohan kan comunidad.

Nagpasalamat man si Barcenas ki Alkaldesa Raquel S. Lim, Sanggunuang Bayan sa liderato ni Bise Alkalde Marcel Michael  P. Pan, Municipal Peace and Council, Municipal/Barangay Anti- Drug Abuse Council asin oficiales de barangay sa saindang padagos na suporta.

An Goa MPS madaling maaccess sa social media sa paagi kan "Goa Mps Csppo" asin  "PNP Goa Municipal Police Station". Hotline number ninda - 09985985992.

OPLAN SITA kan PNP Goa piglatag sa mga stratehikong lugar kan banwa. (Photo - Goa MPS)