PNP hahasaon antes mag-gamit body cams

Dapat bulan pa nin Hunyo ngunian na taon nag-gagamit na nin body cameras sa mga anti-drug-campaign asin iba pang operasyon an Philippine National Police (PNP) apesar na igwa nang guidelines an national headquarters alagad igwa pang pinag-uulayan sinda sa judicatura nganing maseguro na an ipepresentar na video magagamit na evidencia.


Igwa nang inisyal na suplay sa mga ciudades asin dakulang mga banwaan an Municipal Police Station alagad saro pa sa dahilan kaipuhan mag-agi sa training an mga Information Technology (IT) nganing hasaon kan saindang trabajo.


Ini an mga pahayag kan Bicol PNP sa paagi kan saindang opisyal na parataram Police Major Malou Calubaquib kan makuanan entrevista kan Bicol Mail sa paagi nin telepono.


An supplier kan body cameras iyo an makunducir nin training sa mga Information Technology asin miembros kan PNP na ma-eenvuelto sa anti-drug campaign asin iba pang operasyon nganing gabos recorded sa tunay na oras mantang mabugtak nin TV monitoring para gabos na actividad sa operasyon na maheheling sa saindang Command Center.


Kan magbisita sa Bicol si PNP Chief, Lt. Gen. Guillermo Eleazar kan Mayo 2021 perang aldaw matapos mag-asumir sa puesto nagpangako dapat mag-gamit na kan body camera an kapupulisan sa saindang mga operasyon alagad huli kan mga kaulangan pendiente pa an sinambit na plano.


Sinabi kan jefe kan PNP sa nasyon nganing mahale an mga pagdududa kan publiko sa mga awtoridad na envuelto sa drug operations dapat igwa na sindang ipapaheling na video bilang mga evidencia.


Alagad dai man siya nag-asegurar na kun igwa nang body camera dai na-ngangahulogan na dai na magiging madugo an operasyon kun napapalaban an safety kun naka-kumprumiso na an saindang personajes para man sa proteksyon kan saindang buhay laban sa mga sindikato sa droga.


Si Eleazar, nagbisita sa Camp Ola kan Mayo 30-31, 2021 na saro sa mayor na isyu sa PNP na mawot niyang marealisar an saiyang internal cleansing program para sa mga reforma kan 220,000 na kapulisan.


Nakatalaan na siyang magretiro sa serbisyo sa Noviembre 2021 para sa saiyang mandatory retirement. (DPAureus)