PNP MARIKAS sa CamSur advocacia vs abuso sekswal

An Philippine National Police sa Camarines Sur sa paagi kan Women and Children’s Protection (WCPD) saindang papaurogon an kampanya sa kriminalidad lalo na sa mga kababaehan asin mga menor de edad kasunod kan naglalangkaw na casong pang-aabuso sekswal

An PNP CamSur nag-organisar kan Maging Alisto Rigmat Isip Kontra sa Abusong Sekswal (MARIKAS) na saro sa saindang misyon sa advocacia sa nagbabalga sa ‘‘Anti-Violence Against Women and their Children Act of 2004.’’ Sa saindang proyekto nagkukunducir sinda nin ‘‘awareness campaign’’ sa mga kababaehan sa lambang banwaan kan provincia.

Ini an mga pahayag ni P/Major Maria Victoria Abalaing, opisyal na parataram kan PNP Camarines Sur huli kan naglalangkaw na mga casong rape asin Acts of Lasciviousness, mala ngani nagsakat na sa 55 casong mga pang-aabuso sa kababaehan sa Camarines Sur poon kan Enero 2022 hasta Oktubre 2022.

An Libmanan, Buhi asin Pili digdi sa provincia iyo an may halangkaw na caso na nagaabot sa tigrilima. An 55 caso dai paman pigcoconsiderar na ‘‘alarming’’, sabi pa ni Abalaing.

Alagad an mamundo huli ta kadakli kan caso iyo an incestuous rape o sadiring tawo o kadugo an mga responsable sa krimen.

Igwa nang 123 na mga suspechadong paralupig an naarestar kan mga awtoridad poon kan Enero 12, 2022 hasta Oktubre 6, 2022 mantang kan nagtalikod na taon 104 na mga wanted an nadakop na may mga casong panglulupig.

An sinambit na grupo igwa nang pigwawarak na mga flyers kun panong malilikayan kan mga babae an abuso sekswal.

Sinabi pa kan PNP an saindang intensyon bakong mag-panic envez abisohan nin amay nganing maging bihilante sa kapalibotan na dapat maging responsable man an ama asin ini bilang mga magurang.

Mientras tanto, saro sa prioridad kan PPO digdi sa provincia iyo an ‘‘cleansing’’ o paglinig sa laog kan saindang organisasyon orog na an pag envuelto kan miembros kan PNP sa mga ilegal na actividad.

Saro sa naging lakdang ni Provincial Director P/Col. Julius Cesar Domingo iyo an drug testing sa kapupulisan sa provincia.

An patanid man kan provincial director sa mga MPS na dai maging envuelto an saindang miembros sa ilegal na droga.