PNP mataong seguridad sa pagtransportar kan EVMs

An Philippine National Police (PNP) sa Bicol nagcierto na matao sinda nin mga security escort sa mga personajes kan Commission on Election (Comelec) sa pagtransportar kan mga Electronic Voting Machines (EVMs) asin election paraphernalia hale sa rehiyon cuatro.


Sa ginibong virtual meeting kan PNP Bicol sa pamamayo ni Brig. Gen. Jonnel Estomo, mga PNP Provincial Directors, Chief of Police asin City Director asin kan Comelec sa pamamayo ni acting regional director Rafael Olano, nag-asegurar an PNP na seseguradohon ninda an proteksyon sa mga opisyales kan commission asin sa mga EVMs asin election paraphernalia hale sa Manila.


Ini nganing mayong mangyari sa ano man na pagprubar kan mararaot na elemento maging kan armadong grupo asin madara sa kanya-kanyang municipalidad an gagamiton na paraphernalia kabale na ninda an mga official ballots para sa maabot na pirilian lokal asin nasyonal.


An virtual meeting kan Comelec asin PNP Bicol amay nang ginibo dawa na ngani pigtalaan pa sa Marso 25, 2022 an pagsikad kan campaign period sa mga candidato lokal asin an eleksyon sa Mayo 9.


Mientras tanto, an Camp Semion Ola sa Ciudad nin Legazpi nagpahayag na andam sindang magtao nin security escort sa arin man na candidato na kaipuhan an saindang asistencia para sa proteksyon kan candidato alagad kaipuhan magkua muna nin permiso sa sainda.


Katuwang kan PNP sa pagmantenir kan paz y orden sa maabot na eleksyon iyo an miembros kan Philippine Army mala ngani nagwarak na nin dugang na sarong batalyon sa Masbate.


An sarong batalyon segun ki Army Major John Paul Belleza, parataram kan 9th ID sa Bicol gagamiton laban sa insurhencia asin sa pagmantenir kan paz y orden sa maabot na eleksyon.