PNP naka-alerto sa panahon kan undas

An Philippine National Police (PNP) nagdeclara nin heightened alert sa panahon kan piyesta nin gadan asin kalag puon sa Oktubre 29 hasta Noviembre 5, 2022 nganing segurohon na matrangkilo an paz y orden sa ‘‘Undas’’.


Sa Camarines Sur PNP Provincial Office igwa nang direktiva sa 35 mga Municipal Police Station (MPS) asin ciudades kan Naga asin Iriga na maging alerto an saindang tropa bako lang sa mga kamposanto envez sa mga establisimiento asin contra sa mga kalaban kan gobierno.


Si Police Lt. Col. Louie Del Peña, opisyal na parataram kan PPO CamSur nagpahayag na dapat naka-‘‘heightened alert’’ an MPS sa saindang area of responsibility (AOR) asin kaipuhan an dugang na pagwarak kan kapupulisan sa mga kamposanto, establisimiento de negosyo, puerto, airopuerto, bus maging jeepney terminal.


Huli kaini, prohibido muna sa kapupulisan an pagbakasyon sa peryodo kan heightened alert.


An mga lokal na gobierno nagpaluwas na kan saindang kanya-kanya executive order na ibinabawal an paglaog sa kamposanto puon Oktubre 29 hasta Noviembre 5 nganing likayan an pag-ulakit kan coronavirus disease alagad tinutugot an amay na pagbisita nganing dai magsarabay asin limitado sana sa diez por ciento kan capacidad kan lugar.


An dai sana binabawal kun igwang ilulubong na gadan asin an mga kapamilya sana an tinutugotan na maglaog sa kamposanto.


Dawa igwang limitasyon an LGUs sa mga malaog sa pribado asin pampublikong kamposanto an PNP magpapadagos kan saindang ‘‘maximum deployment’’ mantang nasa heightened alert.


Sa lado kan simbahan bawal pa an pag-misa ninda sa kamposanto huli kan pandemya alagad puedeng paagihon sa live streaming.


Dinagdag pa kan PNP Camarines Sur dawa nagbaba an mga caso base sa record sa mga police blotter kan MPSs huli kan pandemya alagad kaipuhan an higot na pagmantenir kan paz y order sagcod na magdeclara nin heightened alert sa panahon kan undas. (DPA)