PNP, PA sa Bicol nakaalerto na sa BSK eleksyon, Undas
Nagrarani an aldaw kan Barangay, Sangguniang Kabataan Elections (BSKE) sa Oktubre 30 asin Undas 2023 an Philippine National Police asin Philippine Army parejong nakaalerto an saindang mga tropa nganing macierto an matuninong na paz y orden.
An Camp Simeon Ola kan Bicol PNP saka 9th Infantry Division kan Philippine Army andam na an saindang tropa nganing magwarak nin mga awtoridad sa panahon kan eleksyon sa mga barangay asin an ika-duwang kasiribotan iyo an aldaw nin Undas sa Noviembre 1.
Si BGen Westrimundo Obinque, regional director kan Bicol PNP nagpahayag yaon an saindang grupo kan Kasurog Cops nganing maseguro na implementar an guidelines kan Comelec para sa BSKE sundo sa aldaw kan pirilian preparado na an deployment kan kapupulisan mantang nagkaperang barangay na nasa red category sa eleksyon sa Albay asin Masbate saka sa iba pang lugar sainda nang natututokan.
An cada Municipal Police Station igwang nakaandam na Quick Response Team na madalagan tolos kun igwang emerhencia asin iba pang insidente sa aldaw asin pakatapos kan pirilian.
Madestino man nin mga awtoridad sa lugar kan BSKE Mall Voting kan Barangay Capantawan, Ciudad nin Legazpi, Albay.
Nagdestino nin abot sa diez mil na kapupulisan sa 3,471 na barangay sa anom na provincia para sa seguridad mantang sinda deputized kan Comelec nganing maimplementar an mga giya sa campaign period asin pirilian.
Pakatapos kan pirilian an sunod naman iyo an aldaw kan Undas madestino nin kapupulisan sa mga kamposanto mientras na katuwang ninda an mga tanod kan barangay.
Sa 9th ID, sinabi ni spokesperson Major Frank Roldan igwang 3,000 na mga soldados an nakawarak na sa 113 mga banwaan asin ciudad sa anom na provincia kan Kabikolan.
Igwa pang dugang na 197 liaison officer, 408 na mga support personnel, 72 na quick response team asin 80 mobility assets na nakadestino sa anom na provincia kan rehiyon.
An saindang pamayo na si Major General Adonis Bajao, Commander kan 9th ID sa Bicol, kan bulan pa nin Septiembre 2023 nag-deploy na kan saindang tropa sa mga barangay na nasa red category.
Sa Philippine Coast Guard, preparado na an saindang 550 personajes na iwawarak sa rehiyon nganing tabangan na maging matuninong an paz y orden an BSKE sa Oktubre 30.
Alagad kabali pa sa saindang misyon iyo man an seguridad kan mga pasajeros asin mga puerto sa Kabikolan.
Nakaandam man an saindang vehiculos asin iba pang ekipahes asin preparado sa ano man na operasyon.
Huli kaini, naglalaom an Comelec Bicol mantang dakul nang ahencias an nagtatarabangan naglalaom sinda kan matuninong na pirilian sa barangay.