PNR central office sa Mla ibabalyo sa Naga

Magigin sibot na an Kalye Balintawak, Barangay Lerma, Ciudad nin Naga huli ta dai mahahaloy ibabalyo digdi sa laog kan bulan nin Septiembre 2024 an central office kan Philippine National Railways (PNR) hale sa Tutuban, Manila.

Pagkatapos kan paghakot sa mga gamit kan opisina, ekipahes, kotse kan tren asin iba pang materyales magigin operational na an central office sa Naga.

Ini an kumfirmasyon sa Bicol Mail ni Greg Mano, opisyal na parataram kan PNR sa tahaw kan saindang preparasyon kabale na an pagsara kan mga ilegal na railroad crossing sa Camarines Sur asin Albay.

Alagad temporaryo sana an central office digdi na posibleng aboton nin tolong taon nganing tawan nin buelo an nagpapadagos na North South Commuter Railway projects.

Si dai magagamit na kotse kan tren sa Manila madalagan sa PNR Bicol para sa dugang na mga viaje sa rutang Ciudad nin Legazpi, Ciudad nin Ligao, asin Ciudad nin Naga kabale an rutang Naga-Sipocot, sabi pa ni Mano.

Tamang-tama ngunian na panahon nin Peñafrancia fiesta makakalunad sa baratong flete kan tren an mga debotos ni Ina na mapasiring sa Naga.

Dinagdag pa kan PNR an ginigibo nindang pagsara kan mga ilegal na crossing mantang nagdadakul na an mga insidente na side-swipes na nag-abot na sa 31 insidente mala igua nang 20 iredo asin anom binawian buhay.

Andam sinda na mag-atubang sa urolay sa barangay lalo na sa jefe ejecutivo kan LGUs na iyo an nagpatinampo sagcod nagkaigua nin railroad crossing na nagiging dahilan nin aksidente huli ta mayo man nagbabantay sa lugar.