PNR masangat caso vs parahabon nin relis
Yaon na sa Legal Department kan Philippine National Railways (PNR) sa Manila nganing iyo an magsangat nin caso kriminal sa corte contra sa suspek na nadakop sa akto na nagpuputol kan relis nin tren para ipabakal sa junkshop.
Dakulang aksidente sa premirong viaje sa ruta kan Naga-Legazpi kun dai nareparo an insidente, segun sa PNR.
An insidente nangyari sa Baao, Camarines Sur sarong semana antes magpoon an ruta kan commuter train Naga – Legazpi na tolos pigreport sa Manila alagad an masangat nin caso iyo an Legal Department, sabi kan opisyal kan PNR sa Ciudad nin Naga na si Greg Maño.
Delicado kun dai tolos nadakop asin dai nareparo puedeng maglayog sa Baao, Camarines Sur an premirong viaje pasiring sa Ciudad nin Legazpi kan Deciembre 27, 2023 marhay ngani ta igwang nagmamakulog na mga bihilante kan barangay, sabi pa kan PNR.
Sa report kan Baao Municipal Police Station mga alas 7:50 nin banggui kan Deciembre 20, 2023 sarong empleado kan perokaril an nag-osip sa pulisiya na igwang naghahabon kan relis nin tren sa Zona Estacion Barangay Agdangan na tolos nagresponde an MPS na pinangenotan ni P/MSG Kerwin Awa, Intel PNCO sa pamamayo ni P/Major Dennis Quindara sagcod na inabotan pa sa akto an suspek na pinuputol an pusog na nakapakong relis asin rail clip, gamit an steel handsaw. Dai na nakadulag an suspek na dagos pigramalan kan mga awtoridad. Nabawi sa saiya iyo an panlagadi sa batbat.
Tinutokdo sa pulis kan empleado kan PNR an linagading relis kan nadakop na suspek. (Baao MPS)
An Baao MPS nagpasalamat sa residentes kan barangay na nagresulta madakop tolos an parahabon na dai naman nginaranan kan awtoridad.
Sa lado kan lokal na manjamiento kan perokaril nagpasakat man sa comunidad tanganing casohan an suspek saka dai na liwat gibohon na sarong pang-sasabotahe sa PNR.
An viaje kan commuter train sa rutang Naga – Legazpi naibalik matapos nin anom na taon dahilan kan mga nangyaring calamidad asin nagkukulang kaidto si makina kan manijamiento.
An PNR diesel-powered trains, kayang magpalunad nin sagcod sa 250 pasajeros, 16 nagpupundo sa mga estacion sa Camarines Sur asin Albay nag-oopresir nin baratong flete poon sa P15 hasta sa Ciudad nin Legazpi na P155.
Nahali sa PNR Station alas 5:45 nin aga siring man si hali sa Legazpi PNR alas 5:45.
An viaje nagpopondo sa Naga, Pili, Iriga, Polangui, Ligao, Travesia, Daraga, asin Legazpi. An dugang na flag stops sa Baao, Lourdes, Bato, Matacon, Oas, Bagtang, Washington Drive, asin Capantawan kan Ciudad nin Legazpi.