PNR PROJECT PIG-ENDORSO KI PBBM: Manijamiento pasalamat sa resolusyon kan RDC Bicol

Dakulang bagay sa mga Bicolano an resolusyon kan Regional Development Council (RDC) Bicol na makabali an PNR South Long Haul Project sa mga eendorso ki Presidente Ferdinand Marcos Jr. nganing makaayon sa mga darakulang proyecto sa Bicol para sa 2025 national budget.

Haloy nang piglalangkag kan mga Bicolano na maimplementar an modernisasyon kan perokaril haling Calamba, Laguna sundo sa Sorsogon na dating pinangako kan mga nakaaging administrasyon alagad dai man narerealisar.

An huring viaje kan PNR Bicol-Manila kan Oktubre 2012, alagad huli kan paglamasa kan Bagyong Ofel sa Luzon kabali sa Bicol nagkaigwa nang problema sa serbisyo sagcod ngunian parating inaagihan sana nin mga pangako kan mga nakaaging administrasyon.

Si PNR Naga Station Operations Division Area 2 OIC, Joel Dajac nagpahayag nin pasasalamat sa RDC Bicol nganing ibali sa resolusyon an proyecto sa PNR Bicol.

Mawot pa kaini, na magkasararo an gabos na mga congresista sa Bicol na suportaran an proyecto asin hagadon ki Marcos na marealisar na sa saiyang administrasyon.

Sa first quarter full council meeting kan nakaaging semana abot sa Php430-B projects an saindang pig-endorso kabali an Airport Development Projects kaayon an konstruksyon kan bagong aeropuerto sa Ciudad nin Naga asin Masbate, asin an feasibility study para sa Sorsogon-Samar Bridges Project asin iba pang mga proyecto sa rehiyon Bicol.

Ini base sa media release kan National Economic and Development Authority (NEDA) na pinamamayohan ni Director Luis Banua.

Sinabi pa kan NEDA an PNR project kabali sa tolong darakulang proyecto na inaprubaran kan consejo na hahagadon ki Presidente Marcos sa gigibohon na diyalogo kan mga RDC chairpersons nationwide nganing makabali sa prayoridad na proyecto sa 2025.

Sa ngunian an ruta kan commuter train sa Bicol iyo an Naga-Sipocot asin Naga-Legazpi.

An modernisasyon kan PNR Bicol na an fondo uutangon sa nasyon kan China pinangako sa dating administrasyon ni Presidente Rodrigo Duterte, alagad sagcod sana sa pangako dai man narealisar.