PNR project sa Bicol hinuhurot ipadagos ni Presidente Marcos

Matapos matunod sa dating administrasyon ni Presidente Duterte an planong modernisasyon kan Philippine National Railways (PNR) sa Bicol, si Congresista Gabriel H. Bordado Jr. kan tercer distrito kan Camarines Sur hinurot na ki President Ferdinand Marcos Jr. na dapat ipadagos an proyekto mantang makakatabang sa pag-uswag sa lado nin economia sa rehiyon.

Magigirumduman si Bordado haloy nang pigbobosol an pagbuhay kan perrokaril sa Bicol nganing makabalik na an regular na viaje sa Southern Luzon.

Kan nagtalikod na administrasyon naglalaom na kuta an mga Bicolano na marerealisar an proyekto alagad nagpalyar.

An viaje kan train kan padagos pa an operasyon kaini sa Manila-Bicol dakul na pasajeros an natatabangan mantang barato an flete sagcod digdi na nagtatransportar kan mga produkto agricultural.

Alagad an rutang Manila napondo huli kan nangyaring danyos kasunod kan mga nakaaging calamidad.

Bako lang suporta sa lado nin economia envez maging sa trafico, sabi pa kan congresista.

Sinabi pa sa Bicol Mail ni Bordado mantang nagpapadagos an railways na nagseserbe sa mga commuters sa Metro Manila sundo sa Calamba City sa provincia nin Laguna, an pagbuhay kan perrokaril dakulang benipisyo sa mga yaon sa puerang lugar kan Bicol nganing pacil na sa sainda makaabot sa Metro Manila saka ipabakal an saindang mga produkto sa agricultura.

Magigirumduman perang bulan kan magtukaw sa Malacañan si Presidente Marcos, an saiyang Transportation Undersecretary for Railways Cesar Chavez nagpahayag sa media na nag-back out an China nganing fondohan an Calamba – Bicol, kabali an Tagum-Davao-Digos

Sinabi pa ni Chavez an Duterte administration’s NEDA Board naaprubaran an railway projects na fofondohan kan Office Development Assistance (ODA) loan sa China.

Alagad segun pa sa DOTr an negosasyon na nagpoon kan taon 2018 nagpalyar kan dai aksyonan kan China sa kahagadan kan gobierno kan Filipinas para sa ‘‘funding’’.

An sinambit na funding request para sa railway project naigilid sana sa lamesa kan Hunyo 2022 na mayong aksyon. (dpa)