Police visibility prayoridad kan bagong PD kan PPO CS

Dapat iguang mga regular na ‘‘police visibility’’ sa area of responsibility (AOR) kan mga Municipal Police Station tanganing maseguro an paz y orden sa Camarines Sur.

Ini an saro sa mga directiva kan bagong Provincial Director Col. Virgilio Olalia Jr. kan PPO Camarines Sur sa premirong command conference sa mga jefe de pulisya sa 35 municipalidades asin Ciudad nin Iriga kasunod kan saiyang pag-asumir sa posisyon efectivo kan Agusto 1, 2024.

Laen pa kaini, sa press conference saiyang sinabi na kabale sa tatawan nin atensyon kan PPO iyo an suporta sa kampanya sa ‘‘drug cleared’’ sa mga barangay na padagos na pigmamawot kan PDEA.

Mawot mangyari kan bagong PD na dapat naheheling an mga police visibility sa comunidad na iwawarak kan cada MPS na saro ni sa panlaban contra kriminalidad kabale na an kampanya laban sa ilegal na droga asin iba pang ilegal na actividad.

Alagad sa posibleng rigodon sa mga jefe de pulisiya, iginilid ngona an plano asin an saiyang paliwanag kaipuhan ipaheling an saindang performance kan cada MPS.

Kabale na an marhay na koordinasyon sa mga LGUs asin opisyales de barangay pasiring sa comunidad na magiging katuwang sa kampanya para sa katuninongan kan sarong lugar.

Si Olalia, dating jefe kan operational division kan PNP Regional Office, sarong Bicolano tubong San Jose, Camarines Sur naging jefe de pulisiya sa nagkaperang MPS sa provincia asin Ciudad nin Iriga.

Siya iyo si nagribay ki dating Provincial Director Julius Ceasar Domingo sa ginibong turn over of command kan Hulyo 31, 2024 na ginibo sa Digital Transformation Center kan Capilio Provincial kan Camarines Sur sa Barangay Cadlan, Pili, CSur.

Naging juespe de honor sinda Gobernador Vincenzo Renato Luigi R. Villafuerte asin PGen Andre P. Dizon, Regional Director kan Police Regional Office 5.