Police visibility sa mga simbahan kan Naga, mantenido kan NCPO

Nagseguro an Naga City Police Office (NCPO) sa pamamayo ni City Director Col. Gilbert Farinas sa publico orog na si nag-aatendir sa mga ‘‘Simbang Gabi’’ sa manlaen-laen na simbahan na igua sindang nakadestino digdi nin miembros kan PNP kabale na sa centro kan ciudad nganing maseguro an pagmantenir sa paz y orden.

Nagpoon an Simbang Gabi kan Deciembre 16 nin agang amay sundo sa pagsabat kan aldaw nin kapaskohan igua sindang nakawarak na kapupulisan.

An Naga, sarong matuninong na lugar alagad segun sa NCPO mantenido ninda an ‘‘police visibility’’ maging sa mga centro komersiyal mantang katuwang man ninda an Public Safety Office kan City Hall asin mga barangay tanod.

Sa ilegal na droga padagos an saindang higot na kampanya mala ngani minsan sunod-sunod an mga nagkakataralikop.

Hagad lang ninda sa mga residentes sa barangay an cooperasyon nganing madaling madakop an mga envuelto sa ilegal na droga.